Datu(m) p(er)copiam /

Jndeme namen goddes amen We albrecht von der gnade goddes bischop to Halb(e)r(stad) alle den de dissen bref seen horen edder lesen . don eyne betuͦghi(n)ge / eyner ewicheyt also hir na steyt bescreue(n) vor vns is ghe wesen beͤde vnser ghetruͦwer Ratmanne vn(de) borghe(re) to Aschersleue vn(de) begheͤreden dat se / von vnsen gnaden vn(de) mit vulbort vn(de) willen des prouestes der Ebbedeschen vn(de) des koue(n)tes ghemeyne to vnser vrowen buten der stat to As=/chersleue muͦsten buwe(n) eynen altar goddes denst to merende vn(de) frucht vn(de) nut to bri(n)ge(n)de inder parrekerke(n) to Aschersl(euen) . de en ingheeghe(n)t / is von vnsen voruarden mit vnses Capitels witschop vn(de) willen . den altar willen se be wedeme(n) mit almosen de dar to bescheden vn(de) ghe gheue(n) / sin mid ver marc gheldes Aschersleuesgher weri(n)ge des hebbe we na orer begheri(n)ge se uortwidet vn(de) erloͤuen on dat van vnser gheystlike(n) walt / weghene indissem ieghenwerdighe(n) breue mit alsodenem vnderschede dat des Ebbedesche des goddeshuses vnser vrowe(n) bute(n) der stat to Aschersleue / we de were nu eder hir na an deme altare de leen weͤre ewelike(n) schal beholden indisser wise vor wene de Rat to Aschersl(eue) endrechtliken / beͤdet den schal de Ebbedische dorch god vn(de) dorch truwer bede willen des Rades to Aschersl(eue) an allerleyge weddersprake beligen vn(de) beleͤnen / vn(de) anders nemande To dem altare schal me alle daghe holden . de ersten missen wanne dat man erst mettene lut to der parrekerken / an alsuͦlke(n) tiden vn(de) stunden dat it der parrekerken vromlik si vn(de) neyn hinder Oc so wille we also we von Rechte scholle(n) dat de preste(re) / de mid dem altare beleghe(n) werden nu . eder hir na hemelke(n) noch openbare neynerleyge opper noch votiuen an sik neme(n) scholle(n) . se en=/deden dat der Ebbedische(n) vn(de) den vrowe(n) to gude wanne dat gheboret sich to Rechte to der Parre vn(de) scholle(n) dat be vesten mid ere(n) eden vn(de) / mit erem rechte worde auer en an selgherede wat bescheyden lik dem Proueste eder sinen Cappellane(n) dat muͦsten se wol entfangen Oc so / wille we nach der begheri(n)ge vnser vorbenomden Ratmanne vn(de) borghe(re) to Aschersl(eue) dat alle dat opper dat op den altar ghe oppert wert / to suͦnderlike(n) tiden . vn(de) stu(n)den vn(de) indeme gantzen Jare eweliken mit vnser. vn(de) vnser nakomeli(n)ge vulbort vn(de) des prouestes . vn(de) de De / ome na kome(n)de sin schal volghen der Ebbedeschen vn(de) den vrowen indat Closter to eyner beteri(n)ge erer proue(n)de vn(de) to eyner bedechtnisse / alle der de de almusen ghe gheue(n) hebben vn(de) noch gheue(n)de werde(n) to der ewighen spende de man in vnser stat to Aschersl(eue) innechliken / pleghet to begande enes indeme iare mit almosen to gheue(n)de vn(de) mit goddes denste an vigilige(n) vn(de) an missen dat opper dat vp / den altar ghe oppert wert dat schal de ebbedische vn(de) de vrowe(n) beuelen op to nemende to orer hant vn(de) on to antwardene vn(de) on / to gude also hir vore be screue(n) steyt weme se wille(n) we sich des von erer weghene vnder windet dene en schal dar neyn prouest noch / neman vmme strafen eder vordenken To eyner openbare(n) beke(n)tnisse disser vore ghescreue(n)nen stuͦgke so gheue we byschop albrecht / dorch bede wille(n) vnser ghetruwer Ratmanne vn(de) borghe(re) to Aschersl(eue) to dem altare to buwene vn(de) to bewedemene also hir vore / gehe schreue(n) steyt vnse vulbort vn(de) wille(n) also vort also it vns vn(de) vnsen nako(m)meli(n)gen vn(de) deme archydyacone des stoles to Aschersl(eue) / nicht schedeliken si tu engheme rechte(n) vn(de) bestedeghen dat mit dessem ieghe(n)werdighen breue dene we on dar op hebben gheghe=/uen beseghelt mit vnseme groten ingheseghele na goddesbort dretteynhundert iar in deme ver vn(de) veftighesten iare in deme neysten / midweken vor der mit vasten Ok beke(n)ne we Hinrik prouest margreta Ebbedesche Saphia priorinne vn(de) de samni(n)ge ghemeyne / des Closteres to vnser vrowen buten der stat to Aschersl(eue) dat we to eynem orkuͦnde disser vtschrift hebbe(n) beseghelt dissen / bref mit vnses Capitels ingheseghele