Wie Lodewich van der gnade goddes vnde des Stoles to Rome ghekorn to Halb(er)stad Bekennen openbare indisseme / ieghenwerdighen breue , Dat wie vnse lieuen ghetruwen . den Rat vnd(e) die buͦrghere ghemeynliken to Asschersleuen / vnd(e) iowelken sunderliken vnd(e) die stad willen laten vnd(e) behalden bẏ alleme rechte vrẏheẏt vnd(e) wonheẏt , also sie / van aldere hebben gehad vnd(e) willen on dat beteren vnd(e) nicht ergheren Ok moghen sie halden alle die breue / die sie vor vnser thid mit willen , vnd(e) wisscop vnses herren Bisscop albrechtes gheborn van brunswich vnd(e) anderer / vnser vorvarn , vnd(e) bẏ namen de breue de sie den anderen steden Halb(er)stad vnd(e) Quedelingeb(or)g ghe gheuen hebbet / vnd(e) be seghelt sie sin welker leẏge sie sin , dat scal vnse gude wille . wesen , Ok wille wie on truweliken vnd(e) stede / halden , alle die breue ghemeynliken vnd(e) iowelken sunderliken , die on vnse herre Bisscop albrecht gheborn van bru(n)sw(ich) / vnd(e) andere bisscoppe vnse vorvarn vnd(e) ok alle die breue die on ere alde herscop , der asschersleue ghewest is , ghe/gheuen hebben , vnd(e) willen sie ghemeynliken , vnd(e) iowelken sunderliken , truweliken vordedinghen , eres rechten vnd(e) by / rechte behalden ieghen aller malken Ok scollen sie vns truweliken denen . vnd(e) vns vnd(e) vnse(n) goddeshus by rechte laten / vnd(e) wie scollen vnd(e) willen ere holde herre wesen , vnd(e) ok by rechte laten Wiere auer dat wie der dryer stede halb(e)r(stad) / Quedelingeb(or)g , vnd(e) asschersleue ieneghe vorvnrechteden , So scolden sie der breue ane vnse vordechtnisze eder / vnses goddeshuses ghebruken die sie vnder eynanderen ghe gheuen hebben also langhe wantte dat vnrecht weder / dan worde , Ok wille wie sie dar an behalden , dat neyn vnser voghede eder amnecht lude , de seluen vnse borghere / to asschersleue scollen neynem borghere sin gud bevronen , eder bekommeren wore he et heft , deme he vore / mit rechte gheuolghet heft also mit eyner achte et en weren denne alsolleke sake dat sie et van rechte don / mochten , Wiere ok dat sik ienich man , he were wie he were gheystlik , eder werltlik , weder recht eder erer alden / wonheyt welde vndielen , eder houerecht esschen , van vnsen vorscreuenen borgheren , die jar vnd(e) dach in vnser vorscre/uenen stad gheseten hedden , vnd(e) ghewonet hebben , des wille wie sie vordedinghen vnd(e) by rechte behalden , alle / disse vorscreuen stucke , vnd(e) iowelk by sunderen loue wie inguden truwen , vnsen lieuen ghetruwen deme . Rade / den . Jnnigmesteren . der Meynheytmesteren vnd(e) der meynheyt der stad to asschersleue , stede vnd(e) vast vnd(e) vn=/vorbroken to haldene , vnd(e) gheuen on to orkunde dissen bref mit vnseme anghehangheden Jnghe=/seghele truwelken gheuestenet , vnd(e) beseghelt , Na goddes ghebort dritteynhunndert Jar in deme achteden / vnd(e) vefteghesten Jare Jn Sintte Gregorius daghe des heylighen lerers vnd(e) herren