We Radesmestere Rad Burmestere Jnni(n)gmestere . vnde de Burghere ghemeyne to Halb(e)r(stad) bekennen openbare in diss(em) Jeghenwerdeghen breue dat vnse heren . de Erwerdeghe vader in godde vnde here Albrecht / Bischop to Halb(e)r(stad) . her Lodewich van Honsteyn de Eldere vnde dat Capitel dar selues vns hebben gesat vnde setten , de voghedye to Halb(e)r(stad) binnen der muren vor Twei dusent mark lodeghes siluers Bru(n)sw=/wicke¹ vnde Halb(e)r(stedescher) wichte de in des godeshus(es) to Halb(e)r(stad) nut vul vnde al gekomen sint . vnde settet vns de mit allem rechte alsodane wis alse hir na bescreuen steyt . To dem ersten male dat alle de de oppe / der voghedye wonen de vor desser Settinghe schoteden vnde wakeden oppe der voghedye schullen mit vns endrechtliken schoten vnde waken vnde alle borgher recht gelik andern vnsen borghere(n) mit / vns doͧn . de wile dat desse Settinghe steyt vnde we neschullen se op anders nicht dringhen . Sunder wat cloͥstere vnde de papheyt vnd(e) gheystlike lude vnde des Godeshus(es) man in der erghenanten / voghedye hebben dat sin vrye hoͤue Buleni(n)ghe . Eghen . eder vorleghen huse . hoͤue . woͤrde tins eder wat dat si des nesetten se vns nicht , dat schal en volghen vnde bliuen in alsodaneme rechte vn(de) vryheyt / also vore . Ok wat hoͤue sin . eder hus eder worde vnde gut dat dar to hort dar me vore nicht aue enschote de des en vorsetten se vns nicht sunder . dat schal bliuen alse vore vnde bi namen Bartoldes / tegheders huse vnde hoͤue vnde sin guͦt . vnde he seluen vnd(e) sine eruen . dat vnde dene . vnde de se gevryet hebben schal vnde schallen vrye bliuen likerwis alse andere des Godeshus(es) man vnd(e) ere guͦt / de ghenant sin Riddere vnd(e) knechte . Ok de papheyt . klostere gheistlike vnde begheuen lude . manschop vnde vryheyt de se hebben in der ergenante(n) voghedye der envorsetten se vns nicht sunder de / schullen bliuen in alsodanem rechte vnde vriheyt also vore . Ok wat vns(e) heren Biscop Albrechte vorbenomet . eder eft he nicht enwere sinen nakomelinghen boret to bulenede eder to houerechte / vnde denest dat eme boret van sinen klosterhouen klostern vnde gheistliken luden op der ergenanten vogedye des envorsettet he vns nicht dat schal ene volghen alse vore . Ok wat vnse vorge(na)n(ten) here / Biscop Albrecht heft van tinse hoͤuenhusen vnde worde(n) vorleghen eder vnvorleghen des ensettet he vns nicht Sunder dat schal eme eder eft he nicht en were sinen nakomeli(n)ghen volghen alse / vore Ok wat vnse heren de Domheren vnde dat capitel inder ergenanten voghedie hebbe(n) dat si eghen oder vorleghen . tins eder gulde . vnde sunderliken vefteyn mark gheldes lodeg(en) suluers / jarliker gulde vriheyt eder Buleni(n)ghe eder wo dat genant si des envorsetten se vns nicht dat schal den vorbenomden vns(en) here(n) den Domhere(n) vnde Capitele volghen vnd(e) bliue(n) in alsodaneme / rechte vnde vriheyt alse vore . Ok we wene vorvesten wolde vor dem dore vor vns(er) heren Meyere des enschulle(n) we vorbenomden Rad vnd(e) borghere to Halb(e)r(stad) nicht verbeden noch hinderen . / ghinghe ok we dare to deme dinghe van den de oppe der vo)ghedie wonen den de vestinge vnde de sake nicht an enghinge de mochte dat don ane vare dar enscholde en neme(n)t to dri(n)gen / de wile dat disse settinghe steyt . Vortmer schal desse settinghe stan Teyn jar an tobekenende van vtghift disses breues dat se de vogedye van vns nicht losen enschullen dar na wanne vnse / vorgenanten here(n) eder ere nakomelinge eft se nicht enweren des endrechtliken to rade worden dat se de vorgenanten voghedye van vns losen welden dat scholden se vns dem Rade / to Halb(e)r(stad) vore weten laten to wynachten vnde denne oppe den neghesten sente Joha(n)nes dach to Middensomer dar na . so scholden se vns vnse ghelt Twei dusent mark der vorbeno(m)=/den witte vnd(e) wichte beriden . Velle auer ene dar wat in dat se vns de Twei dusent mark oppe sente Johannes dach vorgenant nicht betaleden wanne se vns de losinghe oppe / de winachten vore gekundeget hedden so scholde desse settinghe stan van dem seluen Sente Johannes daghe an vort ouer twei Jar so mochten se in dem lesten der twier Jar vns / dem Rade to Halb(e)r(stad) echt de losinghe kundeghen oppe de winachten vnde dar na op den neysten sente Johannes dach to Middensomer vns vnse Twei dusent mark betalen . Were ok / dat se de betalinge oppe de tyt auer versumeden wanne se vns de losinghe also gekundeghet hedden so scholde de settinghe echt twei jar dar na stan . vnde wo dicke dat de losinghe / vorkundeghet worde vnde de betalinge dar na to sente Johannes daghe to Middensomer nicht enscheghe so scholde dat jo vort stan dem gelik so langhe went se vns deme / Rade to Halb(e)r(stad) dat ghelt to twei dusent mark betaleden vnde so scholde we vorbenomden Rad vnde borghere to Halb(e)r(stad) vnde welden de vorghenante(n) voghedie weder antwerden / vns(er) heren biscop Albrechte sinen nakomeli(n)gen eft he nicht enwere vnde dem Capitele vorgenant mit sodanem rechte vnde vriheyt alse se de vorgenante(n) vogedye vor disser / settinge gehat hebben . vnde so scholde we den van der voghedie los laten der huldeghinge de se vns gedan hebben to vns(er) penni(n)ghen vorgenant Ok en schal disse vorgena(n)te vogedie / vns deme Rade vnde den Borgheren to Halb(e)r(stad) nicht verstan . Vortmer de breue de gegeue(n) sin vor diss(en) breue(n) twisschen vns(en) vorgenante(n) heren vnde vns schalme ghensliken / holden an beydent syden an al eren stucken . ane . also disse breue vtwisen de wile disse settinge waret vnde dar na wanne disse settinge vte is so schullen de breue wat dere vor / dissen breue(n) gegeue(n) sint bi aller macht bliue(n) in allen stuken . Alle disse vorscreuene(n) stucke loue we Radesmestere vnde Rat Burmestere Jnni(n)gemestere vnd(e) de Burghere ghe=/meyne oppe dem wibelde to Halb(e)r(stad) in guͦden truwen vnsen heren biscop Albrechte eder icht he nicht enwere sinen nakomeli(n)gen vn(de) Hern Lodewighe van Honsteyn dem Eldere(n) / vnd(e) deme Capitele to Halb(e)r(stad) vorbenomet stede vnde vast to holdene ane jenegherleie argelist vnde hebben des to eynem orkunde disser dingh vnser Stad oppe(n)bar Jngeseghel an / dissen bref gehenget laten de ghegheuen is na goddes bort dretteynhundert jar Jn dem eynen vnd(e) Seue(n)teghest(en) jare In Sente Clement(is) daghe des hilghen heren .