WE Ratmanne Burmest(er)e vnd(e) Innigemest(er)e der stad to Halb(e)rs(tad) be kenne(n) In disseme opene(n) b(re)ue . vnd(e) don witlick / alle den de one . seen . eddir hore(n) lesen . dat we redelike(n) vn(de) rechtlike(n) vor kouft hebb(i)n mid alle der wiscop . vnd(e) / wulbord de dar to hore(n) . Rolene houesche(n) burg(er)e to Halb(e)r(stad) . ylzebenn de no sin husvrowe is . vnd(e) ylzebe(n) de ok Ichteswa(n)ne / sin husvrowe was , der god gnedich sẏ . neghedehalue(n) lodeghe(n) verding Ingheldes Jarliker gulde vor elu . vn(de) vertich / ledeghe mark vn(de) eyne(n) halue(n) verding . de se vns nuͦtlike(n) . vn(de) wol na vnsem wille(n) betalet hebb(e)n . vn(de) we in vnser stad / nuͦd . vnd(e) vrome(n) ghe kard hebb(e)n . disse vorb(e)nomde(n) gulde sculle we vnd(e) wille(n) alle Jarlikes gheue(n) von vnseme Rathuse ¹ . vn(de) / antw(er)de(n) vnser stad tinsmeste(re)n . de . de weghe . vnd(e) steghe pleghe(n) vor to stande . vppe sinte nycolaws dach . dewile we dat / gheld vnder vns hebb(i)n . ane allerleye hindir . vnd(e) vortoch . de . de vorgn(an)te(n) Rolef . ylzeben . vn(de) ylzeben . hebb(e)n mid gude(m) vorb(e)=/dachte(n) muͦde . dorch god be schede(n) . be termelt vnd(e) gheue(n) . to eyner Jartid dorch gnade to krighend(e) ere(n) sele(n) . alle(n) erer frunde / selen . vn(de) alle(n) kerste(n) sele(n) . alle Jarlikes op to neme(n)de . to sinte nẏcolaws dach , Alse vore screue(n) steẏd . vn(de) wedd(er) antolecgene In . / disser wise . alze hir na bescreue(n) steẏd . we vnser stad tinsmest(er)e sin . sculle(n) dissen bref hebb(e)n to der stad hand . vn(de) also don . / Alse disse bref vt wis(et) . dat vor to stande truwelike(n) vn(de) wol . ane vortoginge Also dat se sculle(n) alle Jar von de(n) neghede=/haluͦe v(er)dinge gheldes kope(n) hering vor seue(n) v(er)dinge arme(n) lude(n) to der spende . de . de vorgn(an)te Rolef . ylzeben . vn(de) ylzeben . / rede ghe maket hebb(e)n . Alse der vo(n) Ost(er)wick bref vt wis(et) . den we in vns(er) zit(er)e to sintemertere liegene hebb(e)n . vn(de) w(er)e dat / von den seue(n) v(er)dingen wat ouer bleue . wan me(n) den hering kofte to der vornante(n) spe(n)de . dat scoldeme(n) lecge(n) to den pe(n)ni(n)gen / dar me(n) den arme(n) lude(n) wand scal medde kope(n) . oppe dat . dat , dat deste vulle(n)komen(en) lode . vnd(e) vortm(er) eyne(n) verding / vnd(e) seue(n) schillinge . den silue(n) gulde scal me(n) dele(n) . vnd(e) gheue(n) . Alse hir na be screue(n) steẏd Jowelkeme Ratma(n)ne ses pe(n)nige / der stad sc(re)u(er)e j sch(illinge) Jowelke(n) buͦrmest(ere) vj d(inarij) . vn(de) Jowelke(n) mest(er)e vt den Innige(n) veyr pe(n)ni(n)ge . veyr knechte(n) der stad Jowel/ke(n) dre pe(n)nige . vn(de) ok dorch arbeydes wille(n) de . de silue(n) tinsmest(er)e an dissen gude(n) v(er)eke(n) dede(n) . scolde(n) se vo(n) der silue(n) pe(n)nigen / alle jar wes wan se de jartid be ghan leyte(n) . ok elvene schillinge neme(n) vnd(e) wan me(n) desse spende gheue(n) wolde . so scolde me(n) / zo des rame(n) dat me(n) de spende gheue des vridaghes in den twelften . alse me(n) alder beste konde . vn(de) mochte . Also dat me(n) / se io gheue op eyne(n) vesteldach oppe dat . dat de heringh(e) . den arme(n) lude(n) . to nuͦd . vn(de) to vrome(n) kome(n) mochte . disse vorb(e)no(m)=/den gulde moghe we . eddir vnse nakomelinge af lösen vor elv vn(de) vertich lodeghe mark . vn(de) vor eijne(n) halue(n) / v(er)ding wan we wille(n) vnd(e) vns dat ene(n) is . vnde wan we dat don wille(n) . so sculle . we . eddir vns(ere) nakomelinge / dat vorgn(an)t(e) gheld den benante(n) vns(er) stad tinsmeste(re)n mid dem tinse vul . vn(de) al antw(er)de(n) de se Indisser wis scullen / entfangen vn(de) op neme(n) . vn(de) mid vnseme rade wiscop . vnd(e) vulbord also wedd(er) anlecge(n) . dat me(n) alle disser vorscreuen / guden werck auer wol vo(n) don moghe alse vore . Also dat dar neynerleije hind(er)nisse an valle(n) moghe . des we to / eyn(er) be kantnisse . dissen bref ghe gheue(n) hebb(e)n . be segheld mid vns(er) Anehangede(n) Jnghes(egel) . nach Godd(e)s bord dritt=/eynhundirt Jar in deme seue(n) vnd(e) seue(n)teghest(en) Jare in sinte nycolaws daghe