to vns(er) vrouwen dage /

malk schal syne gheste wol handel(e)n nv to vns(er) vrouwen dage vm(m)e ere pen(n)i(n)ghe vnde late sek de wol be[...] /

jowelk see wen he huse edir heghe dar he vorantworden den wille vnde malk de warne syne gheste dat se / na der lutteken klocken nicht vppe der strate gan ane luͤchten . wanne vnse h(e)ren de Burmeste(re) de wille(n) des / auendes vm(m)e gan we dat andirs halde den wolde(n) se hinde(re)n /

Neymant schal korn kopen bute(n) der kedone Ok enschal neymant korn kope(n) eir de schilt af genome(n) w(er)de /

Neyn werd schal korn kopen mit eynes ghastes pen(n)i(n)gen , Ok en schal neẏn gast korn vppe dem markede / kopen welk gast ok korn vppe dem m(a)rkede kofte dat enscolde neẏn borgir in syne(n) huͤse mete(n) laten /

Ok wille(n) vnse h(e)ren dat hir neyn gast weddir den ande(re)n gast kopen scal neynerleie kopenschap grot / edir kleẏne noch neẏnerleie gud sundir in dem jarm(a)rkede dat schal jowelk wert syne(n) ghaste dortlik don / welk gast nv bin(n)e(n) dat andirs heylde de scholde dat vns(en) h(e)ren weddir don vnde de werd in des huͤse de / kopenscap schege de scholde eyne loedige m(a)rk gheue(n) dar wolden vnse h(e)ren neyne bede vm(m)e liden /

It enschal neymant begheiten vor vnsir vrouwe(n) dage der latirn , Jt(em) enschal neymant nẏghe molt brouwen / vor sente michael(es) dage /

We ok korn to dem m(a)rkede bringet it sẏ hafere edir andir korn de schal it reyne maken we it vnreẏne / bringet dat wille(n) vnse h(e)ren vt der stad wisen laten /

It en schal neymant bẏ lichte laten dersche(n) /

Ok wille(n) vnse h(e)ren dat neyn gherude edir scherre schulle(n) meste swerde noch neynerleie were dragen /

Den Jodden de vppe der stad gude wone(n) scal neymant neyne ouerlust don . noch den vrouwe(n) vppe dem poẏle /

It enschal neymant de holttempne vnreyne maken , vnde neyne heẏmelicheit , noch mestekosene dar vp buwen / noch neyne(n) poel , edir mes , dar in dragen noch schafen , we it dar enboue(n) deide de scholde eyne m(a)rk gheue(n) /

Jt enschal ok neymant de brotscherne(n) vnreyne maken , wen men dar ouer betrid , ysset eyn alt , he schal / dreẏ dage in der deẏfe stocke sitten , ysset eyn ju(n)gh den scal me(n) to der stuͦpe slan /

Deme glik beide(n) vnse h(e)ren vm(m)e de vleisch scherne(n) , vnde vm(m)e de steẏne , dat der neymant vnreyne make / dar entwisschen , we dar ouer betreden worde deme scholde men volgen mit rechte /

It enschal neẏmant mit stro decken noch myt schindelen we ok dar reyde mede decket hebbe de schal / dat aff don eir me(n) dar gr(ote)n schaden van neme we dat so nicht toheilde den wolde(n) / vns(e) h(ere)n volg(e)n myt rechte /