Ek . Claws lenteke buͦrgh(er)e to machdeb(orgh) be kenne in disseme opene(n) breue . dat / de sake . de in deme houe to Rome hangen . twische(n) dem Rade to halb(e)r(stad) . hern / Johanne sconebeck(er)e . vnd(e) Jchteswelk(en) andern eren burghern . de in der sulue(n) sake / rede be nompt sin . op eẏne sẏd . vnd(e) von miner weghene op and(er)e syd . scullen / stillet wesen vif jar na der gift disses breues . Also dat beydersyd neman weruen . noch / vord varn scal mid gheẏstlike(n) rechte in der silue(n) sake . . voghede ok weme mer mid / dem silue(n) rechte vord to varende . na den vif Jarn . welke tid dat w(er)e . de scolde dat / dem ande(re)n eyn gantz Jar vore vor kundeghe(n) . vnd(e) witlick don . vnd(e) nicht in deme jare / de sake weddir an gripe(n) mid gheẏstlike(n) ghe richte noch nement von siner weghene / dat Jar en w(er)e ok vor gangen . . w(er)e ok in der sake rede icht ghe dan . eddir dat . dat / noch scheghe er disse be nomde(n) vif jar to vorn , vnd(e) dat vpsecgende jar dar na . welke / tid dat w(er)e ok gantz . were(n) v(m)me kome(n) . dat en scolde nicht sin . vnd(e) vnghedan wese(n) / dit loue ek vorb(e)nomde Claws lenteke burgh(er)e to magd(eborgh) . in gude(n) truwen . mid mine(n) / buͦrghe(n) de hir na be screue(n) stan . her Claws stvͦne domh(er)re to halb(e)rs(tadt) . her Conr(ad) peruͦe / to sinte mertene . vnd(e) her Johan lenteke vicarius dar silues to dem dome to halb(e)rs(tad) / stede gantz . vnd(e) vnuorbroke(n) to haldene . ane arghelist . des to orkunde gheue we dissen / bref mid vns(er) Anehangede(n) Jnghes(ige)l(e)n be segheld nach goddes bord dritteynhundirt / Jar in deme neghenvn(de)seuenteghest(en) Jare in vns(er) vrowen auende lichtmissen