We . Albrecht domprouest Albrecht . de Eldere des Capittels . vnde dat Capittel . ghemeẏne to dem dome / Johan deken . vnd(e) dat Capittel . ghemeynliken to vnser vrowen to Halb(e)r(stad) . Cord prouest . vnde de Conue(n)t / ghemeynliken to Sente Joh(ann)es vor Halb(e)r(stad) , Hinrik deken . vnde dat Capittel ghemey(n)liken to sente Bonifa=/cio . Themo de eldere des Capittels . vnde dat Capittel ghemey(n)liken to sente paule to Halb(e)r(stad) Beken=/nen openbar mit dessem breue dat we der stucke . vnde article(n) de hir na bescreuen stan vn(de) dar v(m)me / we mit dem Rade vnde den borghern to Halb(e)r(stad) in dedinghen sin . by dem erwerdighen in godde vadere vns(es) / gnedighen heren . Hern Albrechte Bẏschope to Halb(e)r(stad) de an beÿdent sẏden in den dedinghen vns(es) iowel=/kes rede ghe hort . hed eẏndrechtliken vnde ghentzliken ghebleuen sin mit rechte to erscheẏdene To . / dem ersten male vmme de vrẏheẏt der borch to Halb(e)r(stad) . dat de vnghehindert vnde vnghenedert bliue vn(de) / wuͦ men dat mit kopene vnde vorkopene holden schuͦlle bẏnnen der borch So dat vnse domhern vnde / de borghere dar v(m)me nicht mer to twẏdracht komen . . Vortmer vmme dannele dat de vt der borch ghe / nomen is . , . Vortmer vmme de entsegghinghe . de van dem Rade an vnsen heren den domhern gheschen / is vmme dannele . do se den vt der borch halen wolden . . Vortmer vmme hanse van Dvszem de vt eẏne(n) / Closterhoue to sente paule ghenomen is vnde eẏn . wertlik gherichte vppe deme Closterhoue to sente paule / gheheghet is alse we deme . Rade vorkundigheden dat dat eyn vrẏ hoff were vnde beyͤden dat se des . . / nicht en deden . . Vortm(er) . vmme de vorkundinghe . de des neghesten daghes dar na alse dit des auendes ghe / schen was . de Rad van dem . Radhuͮse kundighen let . alse nach weme de Rad sende keme de nicht van stad / an to on den wolden se halen he were wuͦr he were dar se des macht hedden , . Vortmer vmme de luͦde / de vp den vrẏen houen wonen . . Vortmer vmme de tweẏ huͦs . des vndercusters vnde des perners to dem / dome dar de dore af ghebroken sin . wes vnse benante here . vns dess(en) vorscreuenen stucken ghemey(n)liken / vnde bẏsunder(en) vnde den Rad vnde de borghere bẏnnen den neghesten . ver weken na ghift desses breues / in sẏnen openen vorseghelden breuen erscheẏdet mit rechte . dat hebbe(n) we ghevulbordet . vnde louen dat / in guden truwen mit samme(n)derhant . vns(es) heren van Halb(e)r(stad) . dem Rade , vnde den borghern to Halb(e)r(stad) / gantz vnde stede eweliken to holdene ane argheliste vnde inual . Dess(es) to eẏner betughinghe hebbe we / one dessen breff ghe gheuen beseghelt mit des Capittels to dem dome to Halb(e)r(stad) groten openbaren / Jngheseghele . des we alle hir to bruken . Na goddes bord dritteẏnhundirt iar in deme sesten vnde / Achtentighesten Jare des . dẏnsedaghes . na Sente Matheus daghe . des hilghen Apostolen . vnde . / ewangelisten , ,