Ek Hintze van Hersleue buͦrghere to Halb(e)r(stadt) Hanne sin eẏlike Husvrowe we bekenne(n) in dissem breẏue vor allen / den . de on seẏn . eder horen lesen , Dat we anderhalue lodighe mark ingheldes . iarliker gulde , de we vor twintich / lodighe mark gekoft hebben . Bẏ den wisen Radmanne(n) . vn(de) der gantze(n) meẏnheẏt der stad to blankenb(or)g(h) . Met gudem / vore rade vn(de) m(et) wol bedaghtem moẏde , hebben dorch . god gegheuen . Godde . vn(de) Marian siner leẏue(n) moẏder to eẏne(n) / louͦe vn(de) to eẏner eere , . vnde vnsen seẏlen . vnser leẏuͦen elderen . vnde leẏfhoueden seẏlen . vn(de) allen kristene(n) seylen / to troste , . Vn(de) ok vm(m)e gnade to erweruͦende . allen salighen kristene(n) . de des begheren , . Vnde we hebbe(n) de breẏue / de we ouer de benante(n) guͦlde hebben . met wisschop vn(de) m(et) volbord . Der erzamen wisen . Des rades to halb(e)r(stadt) . geantw(er)d(et) / vn(de) bevalen , . Den erliken wisen aldermanne(n) . der kerken sinte merte(n)s to halb(e)r(stadt) . also dat se . de ben(an)ten anderhalue(n) / lodighe(n) mark ingheldes . alle iarlikes . schullen . vn(de) ok gherne willen truͦweliken . ermane(n) vn(de) vpneme(n) , . Vnde / wedder vtreẏken vn(de) gheuen . to deme louͦesange Salue regina . misericordie etc. Den me de uͦasten ouͦer des aue(n)des / pleg(et) to singen . In aller wise . alse de breẏue . inneholden vn(de) vtwisen . de dar ouͦer sint gegheue(n) , . Vnde nameliken / alle auͦende . io dem p(er)n(er)e . iij pe(nninge) . Jowelkem kappelane . ij pe(nninge) , Dem kerken(er)e . ij . pe(nninge) , . Dren schoẏlere(n) iowelkem eẏne(n) pe(nninge) / vortmer . darvan kope(n) . xij . puͦnd wasses vor j m(a)r(k) . konde me sovele wasses nicht kope(n) vor j m(a)r(k) so scholde me / dar to don van deme . dat des voreiares van den kertze(n) ouer bleuen weẏre . also veẏle dat de kertze(n) io van . xij . pu(n)den / worden So bleue(n) dar noch . vj . schillinge . der schal me ij schilli(n)ge . Dem keln(er)e to dem doẏme gheue(n) vor j stouͦcken / wines , Vnde iowelkem aldermanne . ij . schilli(n)ge vor j sto(uͦcken) wines . op vnser leẏue(n) vrouwen dach in der vasten / Scheghe ok dat desang . vorboden wrde dar god vore sẏ , So scholden de alderma(n)ne . de pe(n)ni(n)ge innebeholden / to des goddeshuses nuͦd . al de tid ouer . dat me nicht ensuͦnge , . Ok welk orer . de p(er)n(er)e . der kappelane . eder . der / schoẏlere . to dem louesange nicht en weẏre . deme oder den . scholde me . des auͦendes io nicht gheue(n) , . Dat scholde / ok to des goddeshuses nuͦd . by den alderma(n)nen bliuen , Scheghe ok dat de Rad to blankenb(or)g , . de ij mark / ingheldes . wedder kope(n) wolden . also se don moghen na vtwisinge orer breẏue So scholden de alderma(n)ne , des / benanten goddeshus(es) sinte merte(n)s . med wisschop vnser heren . Des rades to Halb(e)r(stadt) vn(de) volbord . entfange(n) . vn(de) / opnemen , . Vnde ok met rade der ben(an)ten vnser heren . wedder anlegen . an ij mark ingheldes . vnuͦortog(et) / oppe dat io dat lof goddes vn(de) marian siner leẏuen moẏder . deste vollenkomeliker to ewighe(n) tiden . Dar van=/ge oket vn(de) gemeret . moghe werden , . Gescheghe auͦer . dat de ben(an)te guͦlde . van rouͦe . van brande . eder / welke wẏs dat gescheghe . gewoẏst(et) wrde . also dat de alderma(n)ne . des tẏntzes nicht ermane(n) . kuͦnden . Des god / doch also nicht envoͮyghe So scholden se . vn(de) ok dat goddes hus sinte merte(n)s . van allermalkeme . vnbededinget / vn(de) vnbeschedig(et) . dar vm(m)e bliuen . Suͦnder wanne se den tẏns ermane(n) vn(de) hebbe(n) kuͦ(n)nen So scholde me io dat / ben(an)te goddes denst , . na . dar van holden . alse vore , . . Des to orkuͦnd . dissen breẏf , besegheld m(it) minem / anghehe(n)geden ingheseghel . Gheue(n) na Goddes gebord . dretteẏn huͦndert iar in deme tweẏ vn(de) neghe(n)tigheste(n) / iare in sinte Jacobes daghe . des hilghen apostelen , , ,