Ek mathias van hadeber borgher to halb(e)r(stadt) Grete mẏn eelike husvrowe vnde vnse eruen beken(n)en openbar indessem / breue dat we hebben vorkoft anderhalue lodighe mark gheldes Jarliker guͤlde halb(e)r(stedter) were . vt vsem huse vnde / houe op dem holtmarkede dar we inne wonhaftich sẏn . den vromen luͤden den vicarien ghemeẏnliken to vnser vro=/wen to Halb(e)r(stad) vor achteẏn lodighe mark halb(e)r(stedter) were vorbescreuen . de we in vnse vnde vnser erue(n) nuͦt vnde vro=/men ghekart hebben . desser anderhalue(n) lodighe(n) mark gheldes schulle we vnde willen ene betalen ane vortoch dre / verdinghe oppe de paschen de nu erst to komende sint . vnde dre verdinghe oppe sente gallen dach dar neghest / vnde vordmer alle jarlikes oppe de sulue(n) tẏde . Ok hebben se vns den willekoͤre ghedan dat we edder vnse / erue(n) moghen de anderhalue(n) lodighen mark gheldes wedder kopen wen we willen . vnde wen we dat don willen / so schuͤlle we ene dat vorkundighen oppe sente Johannes dach to middensomere vnde gheuen ene den(n)e achteẏn / lodigher mark oppe sente gallen dach dar neghest mit dem tẏnse de sek den(n)e boͤrd vnde oft des icht vorseten / were To beterer wissenheẏt sette we ene boͤrghen vnse soͤne de hir na bescreuen stan . vnde we Curd vn(de) / mathias kindere des benanten mathias van hadeber beken(n)en dat we hebben ghelouet vnde louen in guden tru=/wen vor mathiase vorbenomet vnsen vader he mit vns vnde we mit eme mit samder hant alle vorscreuene / stucke stede vnde gantz to holdene ane jenigherleẏe arghelist . were ok dat dessen vorbenanten vicarien jenich / brok woͤrde an desser betalinghe gheldes edder tẏnses den schulle we vnde willen ene irstaden vnde irvullen . we(re) / ok dat vnser sakewolden edder boͤrghen jenich af ginghe des god nicht en wille er dit gheld vnde gulde al / betalet woͤrde so scolde we andern alle eẏnen andern also guden sakewolden edder borghen indes doden stede setten / bin(n)en verteẏn nachten wanne we des vormanet werden vnde de scal louen ene an synem sunderliken breue / dar mede scal desse bref vnuorbroken bliuen . dat we alle desse stuͤcke stede vnde gantz holden willen so hebbe / we ene dessen bref witliken ghe gheue(n) beseghelt mit vnsen Jngheseghelen na gods bord dritteẏn hundirt / Jar indem ses vnde neghentighesten Jare in sente dẏonisius daghe des hilghen mertelers /