Wie Ratmanne Inny(n)ghismeste(re) . vnde Buͦrmest(er)e der Stad to Halb(e)r(stadt) Bekenne(n) in dissem opene(n) breue alle den de one / seen edir horen lesen . dat we hebb(e)n redelken vnde rechtliken vorkoft veir lodige m(a)rk Ingheldes jarliker ghulde / halb(e)r(stedischer) weringhe vor vertich lodighe m(a)rk ¹ der selue(n) weringhe de vns fuͤl vnde al wol betalet sint vnde we in vnsir stad / nvt vnde vrome(n) gekart hebb(e)n Der vrome(n) vrouwen Ghesen der(e) alden addessleuesschen vnsir medborg(er)schen he(n)ni(n)gh / addessle(ue)s moder(e) vnde gheseken des benante(n) ores sones kinde to orir beider lẏue Disse benante(n) veir m(a)rk tinses / schulle we vnde willen alle jarlikes van vns(i)me Rathuse one reike(n) vnde geue(n) vppe sente nẏcolaus dag(e) dewile dat / se beide leue(n) auer wan orir eẏn sterft so scal der benante(n) ghulde twen m(a)rk vnsir stad mede quid vnde los sterue(n) / vnde dem ande(re)n de denne noch leuendich blift schulle we vnde wille(n) de ande(re)n twn m(a)rk tinses reiken vnde geue(n) / sine leuedage na orir beider dode so scal de gulde al vnsir stad leddich vnde los werden ane weddirsprake eẏns / jowelken Dat one dit von vns vnde vnsen nakomelinghen stede vnde ghantz gehalden werde Des to eyne(r) / Orkunde so hebbe we one dissen bref dar vp gheue(n) besegilt mit vns(i)me openbaren Ingesegele angehengit / Nach goddisbort Dritteẏnhundirt , jar in dem Seuen vnde negentigisten Jare des neisten dinsdagis / na letare der(e) Domiken in der vasten