WE Borghermester(e) Radmann(e) Inni(n)ghesmeister(e) vnde Burmester(e) . der stad halb(e)r(stad) . betughen openbar In dussem(e) breue / vor allen de one seh(e)n horen oder lesen , dat we mit wolbedachtem(e) moyde van der gnan(ten) vnser Stad weghen Rechtliken vnde Redel=/ken vorkofft hebb(e)n vnde vorkopen Jeghenwordihliken in vnde mit Macht dusses vnses breffes , der Erliken vrawe(n) Alheẏde tilen / Remelinghes salig(e)n naghelaten(e)n weddewen itzund vnser medeborgherschen veyr lodighe m(a)rk Jngheldes Jarlikes gulde halbersted(escher) / weringe ore de alle Jarlikes van vnsem(e) Radhuse wol tho ghenoige vnde to dancke tho midde(n)somer alle de wile se leuet , dar / se vns vorghegheuen hefft veyrtich lodighe m(a)rk ergn(an)t(er) halb(e)r(stedescher) were , de we van or uoltho ghenoighe in eyner Su(m)men wul/bestendich inghenome(n) hebb(e)n vnde entphangen vnde vort ghekart vnde ghewand in vnsze gnan(ten) stad ghemeẏnen nüd vnde / vrome(n) wur des nod was vnde behoiff , vnde wen dusse vorgheschr(euene) alheid van dodes wegen vorfelle , dar god doch langhe var / sy vnde denn(e) nach na erem(e) dode hans Remelingh or(en) sone in dem(e) leuende were , dem(e) scholden vnde wolden we de veẏr m(a)rk jar=/likes tinses alle iar wulbestendich gheue(n) van vnsem(e) radhuse up sodan(ne) vorgnan(te) twey tyde , alse tü m(a)rk uppe de winachten vnde / tu m(a)rk up johan(n)is baptiste ok alle dewile he leuet Sunder Na sinem(e) dode is dusse Jarlike tinsz veẏr m(a)rk vnszer gnan(ten) Stad / gensliken vorleddighet vnde losz gheworden , dit loue we vorgnan(te) vor vns , vnde vnse Nakomelinge , dusse vorbenomed(e)n stede / vest vnde vnuerbroken wol to holden(e)n in guden truwen an(e) Jen(n)igherley behelpunge in dracht list oder gheuehrde dusses tho / orkunde unde mehr wissenheit gheue we on(e) dussen breiff mit vns(e)r gnan(ten) stad Groten anghehangheden Jnghesegele bese=/gheld Nach (cristi) ghebord vnses leuen heren veẏrtheẏnhundert iar , dar na jndem(e) vefftighesten jare an dem(e) Mandaghe / vor Sunte Joha(n)nis daghe , des depers vnses leuen heren ihesu cristi et(cetera)