Ek Cord gunterberch Beke(n)ne vnd(e) betuge Openbar in dissem brefe vor Alle den he vorku(m)pt / vnd(e) jrczeget wert dat ek met wolbedachtem Moͤde vmbedwu(n)gen vnd(e) gudem(e) Rade , dem(e) Ersame(n) / Rade der Stad to Halberstad , v(m)me jtwelker Anliggender sake willen vor laten hebbe , vnd(e) vor / late jeghenwardichliken in vnd(e) mit macht disses breuis myne jarliken renthe vnd(e) liffgulde also / nemliken achte mark Halberstedisscher were , de mek von oene to myne(n) liffe vorschreue(n) synt vnd(e) op / Sentte Nycolaus dach bedageden , vor soda(n)ne vorlatinge der jarliken renthe se mek vor noͤget hebben mit / viffvndedrittich loͤdige marken halberstedissch(er) were , de ek van oene wol to der noͤge in eyner su(m)me(n) vulstendich / jn genome(n) hebb(e)n An Redem(e) ouer getaldem gelde vnd(e) entphange(n) vnd(e) gewant in myne nut vnd(e) ffrome(n) , wur / mek des not is gewesen , vortmer v(m)me den bref den se mek ouer alsodenn(e) jarlike renthe Also Nemliken achte / mark hebben gegeue(n) besegilt , enkan ek jtczu(n)t nicht mechtich sin den wedder ouer to Antworden(e)n , doch wen ek / des erst kan mechtich werden , wil ek mit dem sulue(n) breue neynerleye bohelpinge wedder den gn(an)t(en) , Rat soͤken / Sunder one des ouer antworden ane jenigerleye geferde , vnd(e) rede den bref machtelosz vor mek vnd(e) allen / Andere(n) in macht disses breuis dar nene behelpinge ynn(e) to sokende geystlich edder wertlich wer ek edder eyn / ander van myner wegen to ewigen tiden vnd(e) vortye mek alsodenn(e) gn(an)t(en) tinsse mid guden willen der vortmer / nicht mer to esschende An alle geuerde , vnd(e) Rede Alsodenn(e) vorlatinge vnd(e) afftichtinge tynsses vnd(e) breff(en) / warhafftichliken wol to holdenn(e) in eyde stad mit upgerichten liffliken vingeren in guden truwe(n) wolto / holdenn(e) Ane jenigherleye behelpinge list indracht edder geuerde , vnd(e) hebbe dissis to Orkunde vnd(e) merer wissen=/heit dem(e) ergn(an)t(en) Rade hir ouer gegeuen dussen breff mit myner eygen hand geschreuen vnd(e) mynen jngesegil / An dissen breff gehenget Na Cristi gebord vnses leuen heren veyrtheynhundert jar dar na jn dem(e) eynvnde/veyftigesten jare Am(e) mandage na Sentte Anthonyus dage