We Ba[l]tasar domprouest Johann dekenn Vnnd gantze Cappittel der kercken tho halberstadt Bokennen openbar in dussem breue / vor vnnsz vnnsze nakomelinge vnnd alsweme so de dogentsame fruwe grete harmen Ameren selliger nagelaten weddewe / borgersche tho honoüer lüdeleff or son vnnd ander ore kindere vnnd forder ore rechten eruen den dath tholangen mach vnnsz / vorgenanten domprouest Deken vnnd Cappittel ouenberorth myt dren hundert gulden von twolleff hunderth Rinschen gulde(n) / houethstols dar mede her ludeleff Amere selliger ichteswanne dem godt gnade bij vnnsz dem Cappittell achte vnndvertich gulden Jar-/liker Renthe up eynen wedderkop vorkofft hadden gans vorlaten vnnd losz gesecht hebben . Vnnd forder vnnsz myt den obgena(n)ten / dren hunderth gulden houethgeldes myt twolleff gulden na antale der upgerorter achte vnnd fertich gulden alsze jarlikes tinszes / an den Erszamen Rath tho Brunswick im hagen geschulden vnnd gannsz gewiseth hefft , Des szo bokennen wij Baltaszar / domprouest johan deken vnnd gantze Cappittel der kercken tho halberstadt ergedacht Dat wij vth krafft vnnd macht salker / vorwisinge mit vnnser vorwillinge vnnd witschop geschen dem Erszamen Rade to Brunswick jmhagen eren nakomen / hebber dusses breues myt orem guden willen rechter witliker schult schuldich sin dre hunderth Rinsche gulden de we / obgerorder wisze in vnnszer kercken nuͮth vnnd fromen gekarth vnnd gutliken woluornogeth syn . Hir uor hebbe / we ohne vnnd oren middebenomeden rechtes vnnd redelikes kopes vorkofft vnnd vorkopen ehne Jegenwardich Jn vn(nde) / myt krafft dusszes breuͮes twolleff Rinsche gulden jarliker renthe de wij ohne schullen vnnd willen alle Jarlikes gutliken / geuen vnnd entrichten vth alle vnnszer kercken redesten guderen vth vnnszem Reuͮenther uͮp de hilgen dage tho wy(n)nachten / vnbehinderth alles geistlikes vnnd wartlikes gerichtes , Dath hebbe we vnnsz vnnszen nakomen den willen vnnd macht / bohalden Dath wij alszodan(ne) twolleff gulden jarliker Renthe vom Erszamen Rade Jm(m)hagen vnnd oren medebenanten alle / Jarlikes mogen wedderkopen vnnd welkes jares wij dath don willen szo schulle we ohne de losze uppe suͮnte Michaelisz / dach touoren uorkuͮndigen . vnnd ohne denne dar nha in dem twolleff dagen tho wynnachten ore drehundert gulden / houethgeldesz myt vorschulden tinsze vnnd effte des wes vorseten were weddergeuen vnnd entrichten sunder geuerde / ok vnuorhinderth alsz gerichtes geistlikes vnnd wartlikes vnnd szo deme so ghescheyn were schall dussze breff machtlosz sin / alle dusse vorgeschreuͮen artikell vnnd puͮncte duͮsses breues loue we bartasar domprouest Johan deken vnnd gantze / Cappittel vor vnnsz vnnd vnnsze nakomen dem Erszamen Rade tho Bruͮnswick vnnd oren medebenomeden Stede vnnd / vast vnuorbroken sunder geuerde wol tho haldende vnnd hebben des tho orkunde vnnd fullerkomen bewisinge vnnszes / Cappittels grote Jngeszegell witliken heten hengen beneden an dussen breff Geuͮen na der borth (cristi) vnnszes leuen heren dusenth / veirhunder dar nha jndem achte vnndachtigesten Jare des Sondages nha der hilger driger konige dage