WE Burmeister Vorstender(e) vnde gantzen gemeynen Nheber(e) de Harszlingestrate bynnen Halberstat Bekennen vnde betugen openbar / In dussem breue vor vns vnse nakomelinge vnde vor alszweme dat we wolbedacht(en) moides Recht vnde Redelikes kopes vorkofft hebben vnde / yegenwerdigen in crafft dusses breues vorkopen eynen fferdingk Jarlikes tinses Halberstedescher where Jo twelff Halberstedesche penny(n)ge / uppe den schillingk adder so vele mu(n)te uth vnsen reydesten upphenyngen Renten vnde tynszen So we van der gn(anten) Nheberschopp Jarlikes / hebben upptonhemende den Alderluden(n) vnde vorstender(e)n der kerken Sanctj Martinj to Halberstat vnde oren nakomelingen Dar vor eyne / ewige memorien Jn der gn(an)ten kerken Sanctj Martini upp den sundach Jnuocauit¹ vor Hans Rospachs zeliger seyle vnde siner erue(n) to bestellende so Jn der kerken setlick / vnde wontlick Js Ohne den alle Jarlikes tho geue(n) vnde vornoige(n)de uppe den Sundach des lesten Vastelaue(n)des genomet Esto Michi schirst / kunfftich na giffte dusses breues vnde denne vort alle Jarlikes uppe den gn(a)nten Sundagh de wile we sodanen fferdingk nicht wedder aff en / kopen Dar vor vns de dogentsame fruwe Alheit Hanns Rospachs zeliger nagelatene wedewe wol to dancke vornoiget hefft Sesz hal/berstedesche marck Jo Twelff Halberstedesche pennyngke uppe den schillingk de we van or Jn eyner su(m)men fulstendigen uppgenome(n) / vnde entfangen hebben vnde vort Jn vnser Nheberschopp der Harszlingestrate nuth vnde frome(n) wur des not vnde behoff was gekart / hebben Doch so hebben we vns vnde vnse nakomelingen Nhebern de macht beholden dat we sodanen tynsz nemelick eynen Halber/stedesschen fferdingk wedder aff kopen mogen welkes Jars vns dat beqweme sin wurde mit Sesz Halberstedeschen marken Jo Twelff / Halberstedesche pennynge uppe den schillingk adder so vele muͦnte dar men eyns schillinges mede bekomen mach Sundern wan / we adder vnse nakomelinge des beraden worden dat don wolden scholden vnde wolden we den Alderluden vnde vorstender(e)n der gena(n)ten / kerken Sancti Martinj bynne(n) Halberstat Adder oren nakomelinge(n) eyn fferndels Jars vor der tinsze tijdt alse nemeliken uppe Sunte / Martins dagh touorne witlick don vnde vorkundigen Midt sodanem beschede so sodane sesz marck Halberstedesscher werynghe / houetsu(m)men upp eyne better vnde wisser stede wan dat by vns gewest Js beleggen schullen sodanes fferdingk tynses fullenkome/likenn ane vorhinderinge wol ane bekomen mogen(n) vnde sodane Memoria ewichliken dar van [mimstre(n)t] ² geholden vnde nycht vor / nederiget werde vnde denne nha vorlopinge des fferndel Jarsz den gn(a)nten Alderluden adder oren nakomelingen(n) Sesz Halberste/dessche marck Jo Twelff halberstedesche pennynge uppe den schillingk adder so vele mu(n)te vppe den gn(an)ten Sundach lesten vastel/auendes edder Esto michi goitliken wedder geuen vnde vornoigen midt deme bedageden tinsze vnde ufft der welke vorseten were(n) / ane Jnsage vnde geferde Alle dusse vorgeschreue(n) stucke puncte vnde Artickel louen we obgenante Burmeister(e) vorstender vnde / gemeynen Nheber der Harszlingestrate vor vns vnde vnse nakomelynghe den Ergn(an)t(en) Alderluden vnde oren nakomelinge(n) stede / vast vnde vnuorbroken wol to holdende ane argelist vnde geferde Vnde hebben des to starker(e)m geloue dussen breiff midt vnsem(e) / der nheber Jn der Harszlingestrate Jngesegel witliken beneden an dussen breiff gehenget vnde vorsegelt gegeue(n) Na der(e) borth / cristi vnses heren Dusentveyrhundert dar na Jn deme Negentigesten Jare Am(e) Sundaghe Vocem Jocunditatis