We Nicolaus deken Henricus Senior vnd(e) gantze Cappittell sente Bonifacij kercken bynnen halb(e)rstadt Bekennen In dussem / vnszem open(e) breue vor vnsz vnd(e) vnsze nakomen(en) vnd(e) vor allen de dussen suluen vnszen breff sehn horen edder leszen / dat we vnsz mith den Ersamen vnd(e) vorsichtigen Borgermester(e)n Radtmann(en) Innigesmester(e)n vnd(e) burmester(e)n der Stadt / halb(e)rstadt vnszen besunder(e)n guden frunden etliker(en) ernissze vnd(e) gebreken haluen szo sick twyschen vnszen vorfaren / vnd(e) vnsz , eynss vnd(e) dem(e) der gnan(n)ten Borgermester(e) Radtman(n)e Innigesmester(e) vnd(e) burmestere(n) vorfaren vnd(e) ohne ander deylsz / langetijdt her(e) begheuen vnd(e) gestanden vnd(e) vth vnd(e) van dussen naschreuen orsaken vnd(e) Tom(e) irsten van dem(e) groper thye mith dem(e) grauen nu tor tijdt geheyten(e) der Burmester(e) graue de de gnanten Borgermester(e) Radtman(n)e / Innigesmester(e) vnd(e) Burmestere(n) mith oren vorfaren langetijdt vnd(e) bouen mẏnschen gedencken alsze tobehorich orer / Stadt vnder sick gehath der gebruketh mÿt wÿden besettet , de aff gehauwen den grauen myt fyschen besetteth / gefÿschet vnd(e) anders na orem(e) willen dar mÿdde gefaren vnd(e) szo we mennden de Radt den obgnanten thÿe vnd(e) / grauen mÿt vmbescheyde vnsz vor enthelden So de sulue thÿe vnd(e) graue vnszir kercken gentzliken to stunde vnnd(e) / dorch eynen Bischopp to halb(e)rstadt vnd(e) syn Cappittell gegeuen vnd(e) ge eyghenet szo we des Segell vnd(e) breue vnd(e) szo / gude ankunft hebben vnd(e) vor leggen kunden Tom(e) ander(e)n van twelff schillingen halbe(r)stedescher(en) were de we / jarlikes bÿ den gnanten Borgermester(e)n Radtmann(en) Innigesmester(e)n vnd(e) burmester(e)n vnd van orem Radthusze Alsze / achte schillinge van der Stede dar dath Radthusz gebuwet ysz vnd(e) vyer(e) schillinge van dem(e) korne marckede mith / vnszen vorfaren(e) bouen mÿnschen gedencken vnd(e) wente her(e) alsze eruentynsz na vnszer meÿninge gehadt vnd(e) / de vorgedachten(en) Borger(e)mester(e) Radtman(ne) Innigesmester(e) vnd(e) burmester(e) dat wedder(e) vormeÿnden sulk tinsz bÿ / ohne vnszer kercken togude vpp eÿnen wedderkoͤpp gekofft vnd(e) des haluen to velemalen vnsz szodanes tynszes de / loszinge ghekundigeth . vnd(e) tynsz vnd(e) houetsu(m)men aff togeuende gheboden dath we vth vorgeschreuen orsaken / van ohne vpp tho nemen(de) geweÿgerth wenthe her(e) Tom(e) drydden van vehir huszer(e)n hÿnder(e) vnszir Scholen an / der muren na Er(e)n Arnd domprutzes vnszes mydde Canonicks haue vnd(e) twysschen desz vicarien der Cappellen to / Bossleue husze negest belegen dar Borgermester(e) vnd(e) Radtmann(e) mÿt ohren vorfaren wente her(e) etliken Jarliken / tinsz vnd(e) na orer meÿninge alsze eruentinsz vormeynden a(n)ne to hebbende vnd(e) wente her(e) dorch vele Jar(e) dar / van entfangen(e) vnd(e) vpp ghenamen vnd(e) wedder recht szo we meynen So sulke huszer(e) vnd(e) Stede dar sze gebuwet / synt vnszer kercken , der gnanten(e) Borgermester(e) Radtmann(e) Innigesmester(e) vnd(e) Burmester(e) vorfaren vorlangen / jaren gentzliken(e) vnd(e) mÿth aller(e) tobehoringe frẏ vnd(e) vmbeswerth schotes vnd(e) alles neyber rechtes gegheuen / vnd(e) ghe eygenth hebben(e) So we mÿt Segell vnd(e) breuen bewysen(en) ku(n)nen e(tc) In witliker(en) fruntschopp myth gudem(en) / Rade vnd(e) tytlikem(e) handell vnszer kercken togude vnd(e) fromen Ock vorder(e)n vn willen de sick der wegen twyschen / vnsz vnszen nakomen(en) vnd(e) den gnanten Borgermester(e)n Radtmann(en) Innigesmester(e)n vnd(e) burmester(e)n ock oren na/komen(en) begheuen vnd(e) irwisszen mochten(e) , to vormẏden(e) vordragen vorlyketh vnd(e) voreÿnnÿget hebben In dusser(en) / nageschreuener(en) wÿsze dat we deken senior vnd(e) Cappittell vorgnant vor vnsz vnd(e) vnsze nakomen(e) aller schulde / tosprake gherechticheyt vnd(e) eÿgendhomes de we van wegen vnszir kercken Jeghen vnd(e) wedder(e) degemelten(e) / Borgermester(e) Radtmann(en) Innigesmester(e) vnd(e) burmester(e) der stadt halbe(r)stadt desz groper(en) thÿes vnd(e) burmester(e) gra=/uen haluen vnd(e) dar ane vormeynden to hebben vnd(e) der wegen to vele malen jegen sze ansprake angestalt / den suluen Borgermester(e)n Radtmann(en) Innigesmester(e)n vnd(e) bürmester(e)n gentzliken affgesecht vorteghen vnd(e) / ouer gegheuen dar vpp Intokomenden tÿden nicht mehr(e) tosaken(e) , sze dar v(m)me to vernoygende addir belange(n)de / vnd(e) szo dat sze hennefurder(e) des thyes vnd(e) grauen vor eẏn gemeyne orer stadt to gude szo sze der wente her(e) / gebruket hebben ane vnsze vnd(e) vnszer(e) nakomen(en) weddersprake doch vnschedelich vnszer(er) mollen ghebru/ken moghet Vnd(e) der wegen vortygen we szo aller(e) seghell vnd(e) breue de we vpp den suluen thy(e) vnd(e) grauen / hÿnder(e) dem(e) seckhaue nu tor tijdt genomet der Burmester(e) grauen wÿszende , by vnsz wente her tho gehadt / vnd(e) de dorch vnsz edder(e) vnsze nakomen(e) dar vpp wÿszende hir namals mochten(e) ghefunden(e) werden , der we alle / szo iegenwardich Jn vnd(e) mith krafft dusses breues remo(n)tieren vortẏgen vnd(e) affseggen der nu(m)mer mehr(e) / iegen de obgnanten(e) Borgermester(e) Radtmann(e) vnd(e) gemeÿne der Stadt halberstadt desz groper(en) thÿes vnnd(e) / Burmester(e) grauen haluen to brukende , Doch vnschedelick ander(e)n vnszer(er) kercken guder(e)n Jn den suluen breue(n) / mydde beroret vnd(e) benomet dar v(m)me we de bÿ vnsz beholden(e) vnd(e) dem(e) Rade nicht ouer antwerden sÿnt / auir ouirbodich dÿ wur vnd(e) wan des dem(e) Rade van noheden iszt vnd(e) tho orer behoͤff vortoleggende / Ock ohne der Copien togeuende In dem(e) gheliken vnd(e) In aller(e) mathe we deken Senior vnd(e) Cappittell vor / vnsz vnd(e) vnsze nakomen(e) den ergedachten Borgermester(e)n Radtma(n)nen Innigesmester(e)n vnd(e) Burmester(e)n / losz gheuen vnd(e) affseggen de Twelff schillinge halbe(r)stedescher(er) weringe de we wv vorberuͤrt va(n) ohne / vnnd(e) orem(e) Radthusze alsze achte schillinge van der stede desz Radthuszes vnd(e) vÿrer(e) schillinge van dem(e) / kornemarckede Iarlikes vnd(e) wente her(e) vpp tonemende gehath vnd(e) vpp genomen hebben See vnd(e) ore / nakomen(e) dorch vnsz vnd(e) vnsze nakomen(e) In thokomenden tyden der wegen nicht mehr(e) to belangende / Sunder(n) der wegen seÿ vnd(e) vmbededinget tho ewygen tyden tho latende Dar vor vnd(e) dem(e) tho eyner(en) / wedderstadinge, vnsz dekene Senior(e) Cappittell vnd(e) vnszer kercken , hebben de vele gemelten Borgermester(e) / Radtmann(e) Innigesmester(e) vnd(e) Burmester(e) vor sick vnd(e) ore nakomen(e) alle ore rechticheyt eÿgendomes / eruentinszes , Schotes neyberrechtes vnd(e) wesz sze an den vorgeschreuenen vyer(en) huszer(e)n hÿnder(en) vnszer / Scholen wenthe her(e) Iarlikes gehath , dar van vpp genamen vnd(e) entfangen hebben gentzliken vorteghen / vnd(e) aff gesecht vnd(e) vnsz vnd(e) vnszer(en) kercken szodan(en) vÿer(e) huszer(en) fry vnd(e) vmbesweret vnd(e) alles eruesz / tinszes Schotes vnd(e) neÿberrechtes wesze wente heer(e) dar ane szo gehath vnd(e) Jarlikes dar van entfangen / alszodanes van vnsz ock van den de van vnszent wegen de vpgenanten huszer In thokomenden tyden / bewonen , nicht mehr tho hesschende furderende edder(e) dar v(m)me tho manende , entleddiget ouer ghe / gheuen , vorlathen , ghegeuen vnd(e) ghe eyghenet , Ethwe(re) de(n)ne dath dar(e) borgher(e) ynne wone(n)den , de / schullen dem(e) Rade to schotende vnd(e) neyberrechte van oren personen vnd(e) guder(e)n vnd(e) nicht van der huszer(en) / wegen(e) gelick ander(e)n borgher(e)n tho donde vorplichtiget syn , desz szo Borgermester(e) vnd(e) Radtma(n)ne sick vnd(e) / oren nakomen an den huszer(e)n beholden vnd(e) we ohne dar ane vnd(e) nichtes furder(e) beke(n)nen Ock schullen / de gnanten Borgermester(e) Radtmann(e) Innigesmester(e) vnd(e) Burmester(e) nemande he sy frowe effte man dede / in to komenden tijden jn den vorgemelten huszer(e)n wonen(e) werden , de neÿne borger(e) effte borgersschen syn / de borgerschopp to wynnende betwingen effte dar tho benoden de wyle sze In den suluen huser(e)n wonen / Vnd(e) dar durch vnd(e) hÿr mede schullen alle ernissze scheell vnd(e) gebreken wenthe heer(e) twyschen vnszen / vorfaren vnd(e) vnsz vnd(e) den mer(e)gnanten Borgermester(e)n Radtmann(en) vnd(e) ock oren vorfaren , der vortalden / stucke haluen irwasszen begheuen vnd(e) susz langhe geholden gentzlicken enthrichtet vnd(e) by gelecht syn / Desz tho warer orkunde vnd(e) merer(er) wissenheyt hebben we deken Senior vnd(e) Cappittell vorgnant vor vnsz / vnd(e) vnsze nakomen(e) den vakegenomeden Borgermester(e)n Radtmann(en) Innigesmester(e)n vnd(e) Burmester(e)n dussen / vnszen breyff mith vnszer kercken grotem(en) angehangeden Ingesegill witliken vorsegelt gegeuen Na c(risti) / vnszes heren ge borth duszent vÿerhundert Iar(e) dar Na Im(e) Eynvnd(e)negentigesten Jare Am ffridaghe In / Crastino Epiphanie d(o)m(ini) anno emp(?)