Ick Henrick ffrancke Besitter(e) der mollen to Bessenleue vor Halbirstadt Bekenne openbor(e) vor meck vor Marga=/reten myne eeliken husfrawen vor mẏne eruen vnd erffnemen vor alszwem(e) de dussen breff sehn edder(e) hore(n) / leszen dat eck mith wolbedachtem(e) moͤde vn(n)d frÿen willen recht vn(n)d redeliken vor dem(e) werdigen heren Er(e)n / Johan Craͤn officiaͤll der kelnerÿen In der kercken to halbirstadt In gerichte vn(n)d richtes stede vorkofft hebbe vnnd / vorkope Jegenwardigen In crafft dusses breues Den werdigen heren Deken Senior(s) vnd gantzem(e) Cappittele / Sente Bonifac(ius) kercken bÿnnen halbrestadt mÿnes gudes heren virtich schillinge hallb(i)rstedescher(en) were alsz In der(e) / nageschreuen tinsz dagetijdt bynnen halb(i)rstadt genghe vn(n)d gheue isz Jarlikes tinszes vn(n)d renthen an(e) vn(n)d vth / der gnanten mÿner mollen to Bossenleue mith aller rechticheit vn(n)d to behoringe Bauen dem(e) eruentinsze vn(n)d / ock dem(e) gekofften tinsze den eck effte de besitter(e) des suluen mollen den er(e)gnanten mÿnes erfftinsz gudes heren / na lude vorsegelder breue dar ouer gegeuen Iarlikes vorplichtet bÿn effte syn to vornogende Sodan(e) virtich / schillinge Iarlikes tinszes wil eck vn(n)d mÿne eruen effte In tokomenden besitter(en) der suluen mollen schullen alle / tokomende Iar(e) na dat duss(es) breues den vorberoͤrden mÿnen heren vpp(e) de hilgen dage to paschen ane Ienniger/leye hulperede gutliken vornoͤgen vn(n)d betalen Dar vor eck van den er(e)gnanten mÿnen heren deken Senior(e) vn(n)d / Cappittell to guder genoge entfangen vn(n)d vpp(e) genomen hebbe Twelff marck halb(i)r(stedescher) were vor eyne(n) schilling / Teÿn halb(i)rstedesche nÿe penni(n)ge to rekende vn(n)d de eck vorth in mÿne vn(n)d mÿner(e) eruen nuth vn(n)d fromen / gewandt vn(n)d gekarth hebbe Ock wil eck vn(n)d mÿne eruen effte In tokomenden tijden besitter(e) der gnant(e)n mollen / schullen szodan(e) mollen mith aller tobehoringe vorder nicht vorpenden vorsetten edder anderwisz mith tinszen / besweren ane der gnanten heren willen vn(n)d vulbord Vorder hebben meck vn(n)d mÿnen medebenomeden de / er(e)gnant(e)n heren den willen gedhaͤn dat we de vorschreuen virtich schillinge tinszes mogen wedder affkopen / welkes Iares we willen vn(n)d wen we dath dhoͤn willen dath schullen we den er(e)gedachten mynen heren / touor(e)n vpp(e) wÿnachten vorkundigen vn(n)d de(n)ne dar nha vpp(e) de negestuolgende hilgedage to paschen Twelff / halb(i)r(stedesche) marck der vpgnant(e)n halber(stedeschen) were houetsu(m)men , mith allen bedageden vn(n)d vorszethen tinszen In / eyner su(m)men gutliken vornoͤgen vn(n)d betalen ane Jennigerleye Insage argelist vn(n)d geverde Dusses / to groter wissenheyt vn(n)d gelouen hebbe eck henr(ik) , den Ergnant(e)n werdigen heren officiaͤll gebeden / dath he dussen vorberoͤrden koͤpp mith allen artikeln vn(n)d Inholde van synes amptesz wegen bestedigen / vn(n)d dussen breff mith synes official(is) angehangeden Ingesegill vorsegelen wille(n) Vnnd(e) we Johannes / Craͤn officialis der kelnerÿen Jn der kercken to halbirstadt Bekennen openbor(e) In dussem(e) suluen breue / dath we v(m)me bede willen Henrick ffrancken dussen vorgeschreuen koͤpp mith allen vorberorden püncten / vn(n)d artikelen van vnszes amptesz wegen bestediget vn(n)d den obgnanten heren Deken Senior(e) vnnd(e) / Cappittell sente Bonifac(ius) Kercken bynnen halbirstadt dussen bref dar ouer(e) mith vnszes official(is) anghe=/hangeden Ingesegill vorsegelt ge geuen hebben Na der Bordt (cristi) vnszes leuen heren goddes dusent=/viͤrhundert dar nha Im(e) Eÿnvn(n)dnegentigesten Jar(e) Am(e) Sonauende In Senthe Jurgens dage desz / hilgen mertelers [putibus .... ]