Hannsz Lakenmecker / vnde Hennynck Keyszer / Anno d(o)m(ini) Millesimoquadringentesimo Nonagesimotertio des ffridages na Co(r)por(us) / cristi Hebben Hannsz Grouemuller Munteher(re) vnde Hennyng Wynnyngestede / lutke kemerer van Radesz wegen des vnwillen haluen twusschen Hannsz Lakenmecker(e) / vpp eyne vnde Hennyngk Keiszer vpp andersiden erwassen Eyner dhor Jn keisers / hoff uthe lakenmeckers husze gande Eyne seykulen Jn keysers houe Ock eynes / Mestekouens vnde eyne want twusschen hennyn(n)gk Keisers husse vnde Hannsz / lakenmeckers Brauwhusze Jn dusser nageschreuene wise gehandelt vnde ge / sproken So dat de vnder dhor schal blyuen alse se ittzunt gemaket ys Sun/dern keiser schal in sinem hoffe an de dhor eyne krampen maken vnde eyn slot / vor de dore hengen to orer beider behoff vpp to donde Wan der lakenmecker behouet / schal he Keyser to spreken(n) de schall se denne ohme vngeweigert opene Wan Henn(in)g / Keiser der wedder v(m)me behouet schal se Hansz Lakenmecker ome wedder v(m)me vnge/weigert openen De ouer dhor schall ock bliuen alse se ittzu(n)t Js Sundern laken/mecker schal dar eyn schranck vor tugen Jn de want vornegelt vnde geuestet / So dat de vnderste liste an deme schrancke schal eyner guden handt hogh weszen(n) / vnde ander venster mher de uthe lakenmeckers husze Jn keisers hoff gan schall / lakenmecker alle vorschrancken(n) Dat der Keiser ane schaden blyue De seykulen / schall Hennyng keiszer wyken van lakenmeckers keller so verne Dat dar laken/mecker neynen schaden van en nheme Den Mestekouen den will lake(n)mecker(e) / upp der stede dar he ittzunt steit deme Rade to willen vnde wolgefallen vnde / Keyser vnde sinen eruen tho gude dulden de mestetijt ouer sine swine dar uppe / to Mestende Auer dat he swyne dat gantze Jar dar uppe hebben wolde schall vth bescheden sin vnde nicht geswcheyn vnde keiser schal den konen beschalen dat lake(n)meker / des ane schaden blyue vnde den kouen nicht hoger bedecken wan alse keyser nottorfftige(n) / behouet vnde wat van dem(e) oueszfalle van deme kouen vellet schal Jn lkeisers hoff fallen / Item so schal keiser maken eyne Nuwe want dar de olde want steit de ittzunt twyggher / vake hogh is vnde schal de olden want to hulpe nheme(n) vnde de Nuwen want Drigger / vake hogh maken Dar tho schall keiser alle ander gebuwete an lakenmeckersz husz ge/buwet genszliken affbrecken vnde by bringen vnde to beiden parten mit der Nyggen / want ffredesam sin Den steyn vort an lakenmeckers bruwhusze schal keiszer ock bette/ringe vnde vorschoni(n)ge holden de mest dar nicht ouer Jn dat bruwhusz ga lakenmecker / des ane schaden blyue lakenmecker schall sine dackreune(n) vnde keiszer ock de sine Jn / betteringe holden(n) eyn den ander(e)n vorschaden beware(n) lakenmecker dat water uth sine(m) / keller bliue vnde so na vorberorder vorhandelinge orer gebreken van eyn ander gesat / gescheden vnde gesonet sin Eyn mit dem ander(e)n Dar nu(m)mer Nuwe ansprake adder / vnwillen(n) antoheuende Dat duth so vorhandelt besproken vnde van beiden parte(n) vorwillet Dem(e) Rade gelouet hebben stede vast vnde vnuorbroken wol to holden(n) hebbe(n) / se vnse hern gebeden sodan(e)s Js des Rades bock to eyner ewigen gedechtnisse to vor/tekenen Dat denn(e) v(m)me orer fflitigen beden so dorch meck Johannem Suluergot / vnde befellinge der Ersame(n) myner hern(n) hir vortekent Js am(e) Jare vnde daghe / vor an vortekent