WE Borgermeister Ratmann Innyngesmeister vnde Burmeister der Stadt Halberstat Bekennen In dussem vnsem opene breue vnde Reuersale / vor vns vnde vnse nakom(m)en vor alszweme den dusse breff vorkomet den seyn horen adder lesen Dat de Erhafftige Er Nicolaus Wulff ittzu(n)t vicari(us) / des Altars vnser leue(n) fruwen In der Capellen(n) uppe deme Bossleueschen berge belegen In de ersten vicarie der Kerkenn(e) Sunte Bonifacij bynne(n) der / Stadt Halberstat horende mit sunderlikem Rade willen gunst vnde fulborde der werdigen vnde erhafftigen Ern Nycolausen Amelunges Dekens / Senioris vnde des gantzen Capittels der kerken sunte Bonifacij obgnant der gemelten vicarien lenhern Deme vorsichtigen Hinrick ffrancken / vnde sinen erue(n) De de Molne vnder dem Bossleueschen berge ittzuͦnt genomet In vnde meth aller nuth vnde tobehorin(n)ge van dem(e) gn(an)t(en) Vicario des / Altars vnser leue(n) fruwen ittzunt ergemelt to rechtem erue tinsz gude bekant beseten gebruket genetet vnde fruchte dar van entfangen Ingenome(n) / vnde wente an dusse tijdt Inne hat hefft vnde tho eyne(m) Rechten Jerliken eruentinsze dar van eyne marck Halberstedescher were vnde eyne Scheppel / weites deme obgnant(en) vicario alse sinem Rechten eruen tinszhern geuen entrichtet vnde gulden hefft De sulffte boue(n)gemelte Molne uth sunderliken / merckliken bewechliken Untbarliken vnde schynbarliken orsaken In deme houe(n)tbreue vns dar ouer gegeuen vortalt hefft vor seck vnde syne Na/komelinge In der obgnant(en) Vicarie Willen gunst vnde fulbort gegeue(n) vns vorgna(n)t(e) Borgermeister(e) Radt Innÿngesmeister vnde Burmeister , / der Stat to Halberstat erfflick touorkopende Doch also mit dem(e) vnderschede Dat we obgn(an)t(e) Borgermeisters vnde Radt to Halberstat Twene vnses Rades / frunde dar tho benome(n) uthsetten vnde namhafftich erwellen vnde de vor den Vicario adder sinen Nakomelinge(n) personlick In vnde an stat des Con(n)uͦens / der gemeyne(n) stat In rechtliker gesatter tijdt vnde frist alse bynnen Jare vnde dage vngeferlick vorstellen schullen Den suluen twen schal vnde will de / gnante vicarius edder sine nakomen wan vnde wu vaken des van noden vnde in synen vall komen werdt De ogemelten Molne to Rechtem erue(n) tynsze / alse Recht vnde wontlick isz ane alle behelpp wedderrede vnde argelist bekennen(e) vnde vor Rechte eruetinsz me(n)ne annhemen vordedingen vnde holden De / denne wedder v(m)me vngesumeth reydt ouer deme gnant(en) vicario adder sinen nakomen to gudem dancke nutte vnde frome(n) vor de bekentnisse vnde Recog/nitien eyne marck geldes vnde Jerlick upp Ostern nu hÿn vnde to ewigen tijden eyne marck geldes alle halberstedesche weringe vnde eyne(n) Scheppell / weites to eyne(m) Rechten eruentynsze geuen vnde vngeuerlick dancknamich betalen entrichten(n) vnde vornoigen schullen vnde so Idt Na geschicke des Almech/tigen godes seck also begeuen worde Dat de twe personen alszo vor eruetynszme(n)ne In vnde van(n) wegen(n) der Borgermeister Rades vnde der Stat Halberstadt / angenomen beyde dodeszhaluen affgegan vnde vorstorue(n) sint vnde nicht ehr Denne schullen vnde willen we Borgermeister Rat vnde Co(m)mun(e) an stat der / vorstorue(n) tinszme(n)ne Twene ander vnses Rades frunde dar to beqweme vnde dogende wedder v(m)me In obgemelter Rechtliker tijdt an tonheme(n)de vnde tho / bekennende vorbringen vnde presentere(n) ane uthflucht vnde argelist Den de velgnant(en) Vicarius adder sine nakomelinge In der gemelten Vicarie besitter / vnde possessor De molne mit alle vnde iszliker orer gerechticheit bekennen to lathen Vnde ane alle geuerde annhemen vnde an der marck wu boue(n) gesat / vor de Recognitien vnde bekentnisse genoige hebben schall , doch des geborliken Jartinses vngeuen vnschedelick sin schall So auer we Borgermester / Radtman(ne) vnde Co(m)mun In sulker Rechtliker tijdt Na deme valle vnde vorscheyde , an stat der vorstoruene(n) tynszme(n)ne mit vorachtinge anderer tinsz/me(n)ne to bekennen laten vortobringende vns nicht Richten worden(n) Alse denne schal de vicarius adder sine nakomen de Molne eyne(n) andern alse vorlediget / tynszgut to bekennende Sesz weken vnde dre dage deme Rade to gude holden vnde dar mede stille stan wo we Borgermester vnde Ratma(n)ne des auer / vor achten worden vnde de nicht vorstellen angeue(n) vnde mit der volge vns to bekennende lathen vnse tinszplicht vnde gebore alse wontlick is to donde / boden vnde geuen alse denne schal deme vicario adder sinen nakomen ane alle Rechtes forderinge vnde erkentnisse mit der daͤth bouenbesty(m)mede tijdt / dage vnde ffrist fullenkomen vorschene(n) Sulke molne heymgefallen(en) de ane alle vorhinderinge Indracht erru(n)ge vnde wedderrede touorwende bekenne(n) / edder dar mydde na siner edder siner nakomelinge beqwemicheit mede to handelende vngeferlick tostan vnde beholden sin Dar upp hefft de obgna(n)te Hinrick / ffranck vor seck vnde sine elike husfruwen mit orem guden willen vnde alle sine erue(n) vnde erffnamen mydt hande vnde munde sodane obgemelte(n) Molen / vnder dem Bossleueschen berge belegen vor deme vakegnant(en) Vicario alse sine(n) Rechten erfftinszher(e)n vorlaten vnde ewige aueticht dar van gedan Vnde / we Borgermeister vnde Rat to Halberstat hebben derwegen deme gna(n)t(en) Den Ersame(n) Tylen vam(e) hagen(e) Borgermeister vnde Martin loden to behoff / der Stat to Halberstat de Molne so to entfangende vorstellet vnde pu(n)teret Den de vorgemelte Vicarius vnser Stat Halberstat to gude sodane wy / berorde Molne mit alle orer tobehoringe vnde gerechticheit Alse de Hinrick ffrancke gehat hefft to Rechteme erue(n)tinsze upp vorgeschreuene formen / vnde wise bekant hefft vnde bekennet , In crafft vnde macht des breues vns van dem(e) sulfften vicario vnde Capittele siner lehn her(e)n dar ouer gegeuen(e) / Vnde vor alsodane bekentnisse vnde Recognitien hebben we Borgermeister vnde Radt to Halberstat deme gnant(en) Vicario eyne Halberstedesche marck / Halberstedescher were to guder genoige betalet vnde bereidet Vnschedelick eyner marck der suluen Halberstedeschen were vnde eynes Scheppel weytes / upp de hilligen Ostern to eruen tynsze deme sulfften Vicario vnde sinen Nakomelingen(n) so ock bouen berort ane weygery(n)ge effte Jennygerleie Insage / to betalende Des to bekentnisse vnde openbarer orkunde hebben we Borgermeister Ratma(n)ne In(n)y(n)geszmers vnde Burmesters der Stat Halberstat / obgnant vor vns vnde vnse nakomen(n) Dussen vnsen breff vnde Reuersall mit vnser Stat Groten angehange(n)dem Ingesegel witliken vorsegelt / Gegeuen Na der gebort Cristi vnses heren Dusentveyrhundert dar Na In deme Seuenvnde Negentigesten Jare Am(e) dinstaghe Na Epiphanie d(o)m(ini)