Na der gebort cristi vnses her(e)nn Mcccc dar na Jm(e) Negenvnde Negentigesten Jare Am(e) Achten dage Sanctj Martinj des hillige(n) bisschopp(e)s to / vespertijt dages adder na dar by Sint vor vns borgermeist(er) vnde Ratmann(e) der Stat Helber(stadt) upp vnse Rathusz dar we Jn Radeswise vor / samet seten gekomen vnde erschenen de werdigen her(e)n Ern Conrad(us) prior vnde Johannes kelner alse uthgeschickeden gefulmechti/geden des geistliken hern vnde Abts des Closters huwesborch vpp eyne Lucia Cort Trosters zeliger Nagelatene ittzunt ma(r)tin / gutma(n)s elike husfruwe mit annen vnde ma(r)gareten oren dochtern vnde Bertolde orem sonen(n) Jn biwesende g(e)n(an)t(er) ores huswerdes / vnde Ebbelingk Trostes ores vorstoruene(n) huszwerdes broders up(pe) ander siden vnde gnant(e) hern prior vnde kelner in orer aller / Jegenwerdicheit leuendiger steure(n) ¹ one alle anhorende uppbrachten So alse seck lange tijt etlick twiferdich vnwille Nach dode / Cort Trost(er)s zelig(er) twusschen lucien gn(an)t(er) Cort Trost(er)s nagelatenen husfruwen oren kindern vnde Ebbelinge ore(n) swager vnde / veddern der Beckermollen adder holtemyne¹ dittfur de schen(e) Molen haluen Negest den panne(n)smeden belegen de Cort troster / by tijden sines leuendes zu besittinge vnde brukinge van g(e)n(an)t(en) abte vnde Closter to erue(n)tinsze hadde entholden hadde dat se seck / genszliken mit beiden parten an fulmacht ores abts vnde Closters der Mollenhalue(n) wol voreynet vnde ² vordrage(n) vnde erfflick / egen eynem iszliken sine gerechticheit aff gekofft vnde tornoige wol betalet hedden one de vor vnsz to ore(n) handen vnde behoff / ores Closters ouer to antworden(en) angetogen ewige aneticht vnde vorlatinge vor seck ore erue(n) vnde ey(n) iszlick bisundern / dar nu(m)mer mer up(pe) to sakende to donde , Vnde gebeden des van beiden parten berichtinge offt Jennich van one dar nochInsage / to hedde to entfangende Deme na sint se sam(m)ptlick vnde ey(n) iszlick bisundern dorch den sittenden Borg(er)meist(er) ffricken steyn/houe gefraget vfft de gnant(en) her(e)n prior vnde kelner van ores her(e)n des Abt(e)s vnde Clost(er)s wegen sodane Mollen mit / orer tobehoringe one to willen vnde genoige betalet hebben Dar se in vnser aller des sittendes Rades Jegenwerdicheit / up(pe) Antwurden Dat one de Molle genszliken van gnant(en) her(e)n Abte priorj vnde kelner ores Clostershaluen to guder / genoige eyne(n) iszliken to willen vnde sunderken Ebbelingk troster vor sine vormey(n)den gerechticheit achte halber(stedischer) m(a)r(k) / betalet vnde vornoiget were(n) in biwesende gn(an)ter ffricken steynhoues vnde hans hauwtaws van Ebbelingens vnde Hannsz / Ernstes van des Abt(e)s priors vnd(e) kelners wegen dedingesluden vnde seck erboden dar up(pe) vorlatinge Na gebor vnde be/geringe der gn(an)t(en) hern prioris vnde kelners to donde Sodanns van ohne gehort sint se alle Jntsampt(e) up(pe) gestan / vnde eyn iszlik bisundern up(pe) vorheisschunge g(e)n(an)t(en) bo(r)germeist(er)es vorgetreden vnde mit oren uthgestreckeden handen / to den handen des merg(e)n(an)t(en) borg(er)mest(er)es de obg(e)n(an)t(en) Mollen mit orer tobehoringe erfflick egen eyn iszlik bisunder(e)n / vor seck sine eruen vnde erffnamen to behoff merg(e)n(an)t(en) Abt(e)s prior(e)s kelners vnde Clost(er)s huwesborch vorlaten Se ore / eruen adder neymant van orentwegen Jnto kunfftigen tijden nu(m)mer mher up(pe) tosakende Mit vorwillinge g(e)n(an)t(er) Abt / vnde hern ock ore Nakomelinge dar furder mede to donde vnde latende Na alle oren besten enenkom(m)e ane ore orer / eruen erffnamen vnde Jder mans van orer wegen Insage vorhinderunge adder vorbedinge Des to bekentnisse vnde star/kerm gelouen aller vorgeschr(euen) stucke puncte artikel kopes vnde vorlatinge sodans vor vns geschen vorhandelt / vnde vorwillet ist hebben We v(m)me bede willen g(e)n(an)t(en) hern prioris vnde kelners ock dorch fulbort obge(nan)t(en) vorkopes / sodans in vnsz(e) Stat Cont(ra)cts bock van worden to worden dorch vnsen Scriuer loffwerdigen vortekenen laten vnde / den erg(e)n(an)t(en) hern abte priori vnde kelner to behoff ergedachten ores Closter(es) huwesborch eyne Ware auescrifft / Mit vnser Stat angehengeden Secrete Witliken dar ouer vorsegelt gegeue(n) am(e) Jare vnde dage oue(n)berort