We Borgermeister vnnd Radtman der Stadt halberstadt Jacob Droste vnd Clawesz Schoman Houes heren Henningh Bethman houemeisters vnnd / gemeinen Suͦster vnd Broder des hilligen geistes houͦes tho Halberstad Bekennen vnd betuͦgen openbar jn duͦssem opene breuͦe vor vns vnd / vnsze Nakomelinge vnd vor alszweme de ohne sein ader horen leszen Se alsze de Erhafftige Er Johann Suluͦergod vnser Stadt Scriuͦer vnd Capellan Jm / Negenvnd Achtigesten Jare de twe husze vnd houͦe deme gnant(en) hilligen geiste thobehorende dat eyne dar Hans Frendeken zeliger Jnne plach / tho wonende vnd is dat huͦsz dar men mit den hilligen plecht dorch tho gande sampt deme keller vnd Olrick Hanschenmekers husz gande vnd / dar na dar suͦluͦe Olerik Hansschmekers huͦsz Jm Negentigesten Jare dar gensliken dar wedder gesatten vnd gruntliken vorwoistet was / van vns deme Rade vorstendern vnd gemeinen Sustern vnd Broder des gnanten hoūes vor Seuͦen vnd Twintich Rinsche guͦlden vnd / veir marck halberstedesscher weringe tho sinem vnd siner nabenomeden lyuͦen gekofft vnd doch jn deme kope nicht gelouͦet hadde vp de / woisten Stede Olrick Hansschenmekers em Nuͦwe huͦsz tho buͦwende Noch einen Nuwen Borne alsze he dorch deme houͦe vnd denn(en) / armen Sustern vnd Brodern thokuͦnfftigen tho vnde gebuͦwet vnd mit gehauͦwenen stenen vts der gruͦndt gemuͦret vnd einen / Nuͦwen Steinwech vor den huͦszen bereidet hefft dat we der wegen vnd v(m)me sunderliker guͦnst thouerginge vnd deinstes willen / So he vns vnszer Stadt vnd den gn(an)t(en) sustern vnd brodern gedan hefft vnd noch thokunftigen don mach Ock dat suͦluͦe nuͦwe huͦsz / fuͦllen bynnen buͦwen vnd bereiden schal ohme szodane vorbenomeden kopp bestediget vnd vornuͦwet hebben bestedigen vnd vornuͦwen / den ock Jegenwerdigen Jn crafft duͦsses breuͦes Bekennende dat we vorbenomeden alle samptliken wolberadens modes deme ergn(an)t(en) / Ern Johann Suͦluͦergode vnsem Scriuer vnd Capellane Sanneken luttekenmergers siner maget Johann Suͦluͦergode deme / Juͦngern vnd Katherinen des suͦluͦen Johannis suͦster tho orer aller veir lyuͦen Sodane Twe huͦszen vnd houͦe mit oren / thobehoringen vorkofft hebben vnd jegenwerdigen Jn crafft duͦsses breuͦes vorkopen vor sodane ergn(an)t(en) Seuͦen vnd Twintich / Rinsche guͦlden vnde veir marck Halberstedescher weringe de de gn(an)t(en) houͦes vorstender do vor tyd van ohme entfangen vnd / vort in des houͦes nutt vnd fromen wuͦr des noth vnd behoff wasz gekart hebben Sodaner twiger huͦsze vnd houͦe mit den breuen / vnd alle oren thobehoringen schuͦllen vnd mogen se seck nuͦ vortmer Rauͦweliken vnd nuͦtbarliken de wile Er Johann Suͦlu(er)got / Sanne sine maget Johannes Suͦluͦergot de Junger vnd Katherina sin Suͦster alle veir adder orer(e) em besuͦndern leuͦer Alsze des / hilligen geistes houͦes ffrien priuilegierden guͦder ane vnsze des Rades gn(an)t(en) suͦster vnd broder vnd sust ydermans jnsage vnd / vorhinderinge bruken vnd bewonen dar tho des hilligen geistes houͦes mit opener parten ane alle vorweringe vth vnd Inn / thogande vnd farende bruͦken Ock szo schullen vnd willen sze szodane Twe husze vnd houͦe mit oren thobehoringen Jn gebuͦwe / dake vnd beteringe holden alsze des na tyden noch sin worde weret ock dat se samptliken adder orer ein besuͦnder(e)n deme des noch / sin worde der huszer ein adder beide vermeden wolden des schullen sze wol mechtich sin vnd dar van vns adder vnszen nako/melingen nicht ane vorhindert werden szo furder dar frome luͦde werden Jngesath weret ock dat gn(an)t(e) Ern Johan Sulu(er)gode / adde Jennigem ¹ van sinen middebenomden beleuͦeden erlike bouͦwe vnd schape tho holdende adder we de husze van ohne in me/dinge hedden dar mogen se wol don vnd vor des houes herden mede deiuͦen de ohne de vngeweigert mede hoden schullen vnd / dar vor van ittzlikem kohouͦede einen schillingk vnd ittzlikem Schape Twe penni(n)ge den herden geuͦen vnd furder van / aller vnplicht vnd wertliken borden mit schotten waken entledigt sin Suͦnder(e)n den Neibern Jn der herszlingh Strate alle / Jarlikes drei Schillinge tho Neiberrechte geuͦen vnd furder nicht benodeget werden wan se alle vere van de desz wegendat / vor nach sinem gotliken willen feiste vorstoruͦen sin vnd Katherina einen huszwert ader Eine nach sick leite vnd der husze em / beholden wolde schal he adder de wol mechtich sin Vnde dat vor den vorstendern vnd armen luͦden des gn(an)t(en) hilligen geistes / houͦe Twintich Rinsche gulden geuͦen vnd wan de ock vorstoruen is denne szo schal dat huͦsz ock deme houe gelick dem andern / genszliken heyme fallen vnd entlediget sin dusses tobekentnisse vnd starkerem gelouͦen aller vorschreuͦen stucke puͦncte vnd / artikel gn(an)t(en) Ern Johan Suͦluͦergode Sanneken Johann Katherinen vnd oren middbenomden van vns vnszen nakomelingen / stede vast vnd vnu(er)broken wol schal geholden werden hebben we vnszer Stadt Jngesegel vnd we Jacob Droster Clawes Schoman / houͦes her(e)n Hennigh Bethman houemeister vnd gemeynen Suster vnd Broder des gn(an)t(en) houͦes des hilligen geistes ock tho / merer wisszenheit szodans van vns vnd vnszen Nakomelingen wol schal geholden werden vnszes hilligen geistes houͦes Jngesegel / ock beneuͦen by des Rades vnszer gunstigen Her(e)n Jngesegel witliken benedden an dussen breiff gehenget Na der gebor Cristi / vnszes Her(e)n duszen veirhundert Jar dar na in dem Negen vnd negentigesten Jare am Sonnauende na Ephiphanie d(o)m(ini)