Im namen desz vaders des sons vnde desz hilligen geistes amen Disse kumpenie jsz begunt vnd gestichtet na gades gebort dusent CCCXXX vppe desz jars in die ehere der junckfrowen Marien der moder gades van dissen jegenwerdigen luden: Henninck Junge Hermen Bururman Jacob Bururman Johan Schriver Radeke Loquis vnde Heicke Loquis de disse kumpenie hebben ersten begunt de eine mit dem andern in die ehere vnses lieuen hem Jesu Christi vnde siner lieuen moder

1. To dem ersten male hebbe wy gesettet vnde wilkoͮret vnd geschreuen welck broder eine tidt vorsteruet dar schoͮlen die olderlude achte brodere to kesen de de ouer deme licke schoͮlen waken We darto karen wert vnde nicht en waket die schal beteren eine tunne dudesches bieres

2. Item so schoͮlen die broͮdere dem licke folgen to der kercken vnd laten holden II seelemissen vnde eine misse van vnser lieuen frowen dar ein iszlick broder to offern wie desz nicht en deit die schal betern 1/2 tunne dudesches biers vor die missen

3. Item so schal nien broder bydden jennen gast vppe die kumpenie sunder der olderlude erloff wie dat deit die schal beteren teine Lubessche

4. Item welck broder nimpt dem andern sine spise vt sineme vate edder van siner brotschottelen die schal beteren vif penninge

5. Item welck broder geit Sitten in die kumpenie mit siner wehere int messewerde schal beteren 5 penninge

6. Item welck broder vorklagt den andern vor voͮgede edder vor herschop sunder orlof der olderlude die schal beteren l schillinck grot

7. Item welck broder in der kumpenie geith de schal sine kagel afteen vnde sine heiken vt sineme halsze Geith hie Sitten vnde deit desz nicht hie schal beteren 5 penninge

8. Item welck broder den andern het schalk effte schoͮkensoͮne die schal beteren I schillinck grot

9. Item so schal me neinen nemen an disse kumpenie hie en sy echte vnde rechte gebaren vnde sy fredesam vnde sy ein gut knape siner handlunge vnde schal drie drinck(en) vp der kumpenie ehr hie broder wert vppe dat men sehe wat mannes hie sy

10. Item welck broder de dar kumpt hauene vnde sendet hie vppe baden to den oldenluden weme denne de olderlude toseggen vnde de nicht wil helpen bergen die schal beteren 1/2 tunne

11. Item welck broder den andere werpet mit einer we(r)uen edder mit andern dingen vppe der kumpenie die schal beteren VI grot

12. Item welck broder die kumpenie tunne vpstecket sunder dar isz ein olderman vnd VIII broͮdere de schal beteren X Engelsz

13. Item wan die tunne geschencket isz loppet dar wat ouer dat schal men den olderluden bieden sint dar speleluden

14. Item welck broder der kumpenien gelt hefft de schal dat gelt weddersenden vor dem wintere int lant edder hie schal II pennige voͮr einen geuen edder hie moͮge dat bewisen mit sinem werde edder mit II andern brodern dat id eme weder vnd wint benamen hebbe

15. Item kumpt eines mannes bade effte sin knecht vppe de kumpenie deme schal men schencken vnd hie schal nicht lenger sin alsz dat hie sin werf geworuen heft

16. Item dar schal nien broder II geste vp die kumpenie bidden biddet hie mer denn einen die schal beteren I schillinck grot

17. Item welck broder ein glasz tobreckt die schal gan vor die olderlude vnde betalent also dat hefft gekofft Blifft dat stande to der steuene so schal hie betalen II pennige vor einen

18. Item welck broder nicht kumpt to der steuene de schal beteren V Engelsche vnde nen losz werf to makende id sy dat hie reddelick werf hebbe vt der bue

19. Item weick broder vp der kumpenie dabelt effte vp der garden die schal beteren I schillinck grot

20. Item nen broder schal dem anderen todrincken dwersz ouer der tafeln by V Lubesch

21. Item welck broder vnstüre edder snarringe maket vp der kumpenie wen sie drincken schoͮlen die schal beteren l schillink grot

22. Item we deme andern to hasten moͮde loͮchent edder ouel spreckt die schal beteren I schillinck grot

23. Item welck broder nichten kumpt vppe die kumpenie wen se to hope drincken de schal gelden sin halue schot desz negesten blifft dat stande to der steuene hie schal jo gelden II penninge vor einen ouerst hie hebbe dat jo mit der olderlude orlaue

24. Item welck broder baarbenet offert edder baarbenet vp die kumpenie geit die schal beteren V Engelsche

25. Item welck broder den andern keset wedder to schenckende die ene touoren gekaren hefft die schal beteren VI grot

26. Item welck broder sin mesz tut vp den andern vppe der kumpenie die schal der kumpenie nicht werdich sin ¹ wesen vnde schal dar nummer vppe kamen

27. Item welck broder dat nasecht dat men hir handelt to der Steuen die schal nicht werdich wesen vnser broderschop vnde schriuen vt

28. Item wo vnse broder vppe disse kumpenie isz vnde wert besehen vppe den kotenplatze vnde werpet mede de koten de schal vnser lieuen frouwen geuen IIII marck wasz vnde de desz nicht don will die schal bliuen van desser kumpenie

29. Item welck broder deme andern vppe deme wege mit siner wehere also mit schwerden edder mit siner wapene vorelicht wenn de broder van der kumpenie geit edder vppe ander mortstegen de schal disser kumpenie nicht mer werdich sin

30. Item welck broder de dar gekaren wert to oldermanne vnde secht dar neen to dat hie wil nicht will ² wesen de schal vnse broder nicht wesen vnde hie schal nicht werdich sin vnser lickenkumpenie

31. Item welck broder den andern voͮrkop deit noch mit steken offte mit koͮpen die schal betern l schillinck grot vnde 11 marck wasz

32. Item welck broder de dar hier spildet dat hie mit der hant nicht bedecken kann die schal beteren V penninge

33. Item welck broder vp der kumpenie achter losz schleit hie schal betern l thunne biers sunder gnade

34. Item welck broder l schip voͮrfrachten de schal men trachten vppe der kumpenie vnde nen schipper schal fremde lüde enthalen er he den andern brodern voͮrgelecht hefft

Item geschreven na gades borth do me schreff dusent CCC XXX vppe desz jars doͮrch die beiden olderlude Henning Junge Hermen Bururman