Wi ratman vnd de menen borghere der stat to Gnpeswold bekennen vnde betughen openbarliken in desser jeghenwardighen scrift, dat wi omme alle de scelinge vnde twidracht de van desseme orlighe vpstan is twischen den edelen heren Johanne Hinrike Claweze vnde Gherde greuen to Holzsten vnd to Stormeren vnde eren helperen af ener side vnde vns vnde vnsen borgheren vnde vnser stat vorbenomet af ander side sin ghebleven vnde gheghan vp den rath vnses heren des keysers vnde des markgreuen van Brandenborch alse greue Ghumere van Swarczeborch hern Hinrike van Rischacht houemester des markgreuen vorbenomet vnd heren Johanne van Buͦk vnde de se dar tho ten willen So wat se vns bi eren eden dar vmme spreken an minne of an rechte na claghe vnde na antworde de wi dissen vorbenomeden heren vp antworden scolen in der stat tho Rosczok in sente Nicolaus daghe de nu neghest kumpt vnde dar selues scolen se des warden mit voller macht vnd des se oc darselues scolen ene vncscedinge don in deme daghe Epiphanie Domini de dar na neghest kumpt alse de breue to spreken de dar op ghemaket sint Dar wil wi stede vnde vast holden vnde vnthobroken Dat betughe wi vnder vnsem inghezeghele dat an dessen bref ghehenget is na Ghodes bort dusent drehundert in deme twe vnde vertheghesten jare des sundaghes na sente Dyonisius daghe