In godes namen amen jk bernd van slawestorp knape be ke(n)ne vnde be thuͦge / openbar an desser scrift dat ik mid wlbort vnde na rade miner negeste(n) hebbe red=/delken vor koft vn(de) vor laten vnde vor kope vnde vor late an desser scrift . den erli=/ken ma(n)nen den rat ma(n)nen to g(ri)pesw(olde) vnde hern ludeke bochagene vn(de) her cremer / wette(n) vormu(n)d(er)en des godeshuses to me hilgen geẏste vor der stad to g(ri)pes(wolde) vnde ere(n) / nakomelinghe(n) . to der hand vnde to be hof . des sulue(n) godeshuses to me hilgen geste vnde der armen lude de dar ynne sin druͦddehalue mark ẏn geldes de se alle jar vp / boren scholen to su(n)te mertens daghe to deme olden kerkdorpe vte deme houe dar / ẏnne wonet hinseke lippe . vnde van dren verdendels landes dat ik van mẏne houe / dar to lecht hebbe mit alleme rechte grod vnde cleẏne an hals vn(de) an hand mid / ackere buwet vnde vnghebuwet . mid wischen mid weẏde mid haken mid torf / mure vnde mid aller to be horinghe . vnde wẏse se vnde were vnde an de be / sittinghe . der vorbe(nomede)n rente vn(de) to be horinghe vor vẏf vnde twintich mark pe(n)ni(n)ghe / sundescher mu(n)te , de mẏ de vorb(enomede)n vormu(n)d(er)e van des godeshuses weghen to me / hilgengeste al rede ghe tellet vnde betalet hebb(e)n vn(de) de an mẏn vnde mẏ/ner erfname(n) be huͦf ghe komen sin eer desse bref ghe screue(n) ward vnde / ik vnde mẏne erfnamen scholen vnde willen en des waren . vnde scholen it en vnt=/fuͮghen van aller ansprake van alle den jene(n) . de sik an rechte willen noghen la=/ten mid vseme arbeẏde . vnde mid vsen kosten = ok scholen se de rente panden / vnder mẏme lene . wilt de tid des wedderkopes waret , vnde mid den panden to / donde alze pandes recht is , ok , schal ik vn(de) mẏne erue(n) . vn(de) alle de jene de dar leen / ẏnne hebben . en . dat vor laten vor den leen heren wan ik vnde se dar to ghe es/chet werden . Na der tid dat desse kop vs aldus reddeliken schen so hebben de rat=/ma(n)ne to g(ri)peswalde vnde her ludeke bochagen vnde her Ermer wetter van des go=/deshuses weghen to me hilgengeste . mẏ vnde mẏne(n) erfname(n) gheuen de macht van / sundergen gnaden . dat ik vnde mẏne erfname(n) . moghen wedder kopen de vorben(omede) / rente vor vẏf vnde twintich mark sundescher pe(n)ni(n)ghe . binne(n) den negesten dreen jare(n) / de nuͦ an stuͦnden to sunte mertens daghe de negest vore gan is . dust de wedder / kop sche binne(n) dessen dren jaren vppe ene(n) sunte mertens dach . vn(de) vppe den su(n)te mer=/tens dach scholen ik vnde mẏne erfname(n) be reden vnde be talen . de vormu(n)d(er)en des / godeshuses to me hilgen geste de vorb(enomede)n vẏf vnde twintich mark pe(n)ni(n)ghe . vnde de rente / dede borer vp den su(n)te mertens dach mid reden vnbeworene(n) pe(n)ni(n)ghe(n) binne(n) der stad / to g(ri)pesw(olde) ane jeneg(er)leẏe vortogh weddersprake edder argelist . were ok dat ik vn(de) mine erfname(n) binne(n) dessen vorb(enomede)n dren jaren nicht wedder koften de vorb(enomede)n drudde / halue mark geldes alze hir vore screue(n) steẏt soo scholen de vorb(enomede)n rente bliue(n) des / godeshudes to me hilge(n) geste rechte echte kop to ewigen tiden , alle desse stuͦcke vorb(enome)/de loue ik van mẏner vn(de) mẏner erfname(n) weghen den vorb(enomede)nratma(n)ne(n) vn(de) vormu(n)/d(er)en vn(de) ere(n) nakom(m)elinge(n) des godeshuses to me hilgengeste stede vn(de) vaste to hollende / ane jeneg(er)leye hulperede edder argelist to thughe desser dink so is mẏn ingezegel henget / na myne here vor dessem bref De gheue(n) is to g(ri)pes(wolde) na godes bort drutteẏnhundert jar / indeme sos vnde seue(n)tigesten Jare in su(n)te katherine(n) auende der hilgen Juͦnchvrowe(n) hir heb=/ben ouer ghe wesen mathias welant der stad stuuer vnde he(n)ni(n)gh hogenze vnde hinrik / cruse borg(er)e to me g(ri)peswolde ma(n)ne de loue(n) vnde erenwerdich sin