In godes namen amen Jk vicko bere rẏdder he(n)neke beren zone tuͦ der lobenisse / be ke(n)ne openbare an dessem breue vor alle de genen de ene zeen edder horen lesen / dat ẏk na rade vnde vulbort mẏnes vaders vorb(e)n(omede) vn(de) mẏner negesten Reddelkes / kopes vor koft vn(de) laten hebbe vor kope ok vnde vor late an dessem breue den erbaren ma(n)=/ne(n) den borghermest(er)en den ratma(n)nen vn(de) der menheyt der stat tuͦ g(ri)peswold de twe deel / der tuͦ be horynghe vnde dat druͦddendel an der rente alle des ghudes . dat her johan dote(n)=/berch . tuͦ hort hadde vn(de) alze de tuͦe deel der tuͦ be behorynghe . vn(de) dat druͦddendeel der rente / dar na hebben he(n)neke dotenb(er)ghe sine sone tuͦghe hort jn dessendorpen . mesekenhaghe(n) / bresegher . duͦnelsbruͦk . halkenitze . grystow . rẏnus . vn(de) kalenberch . yt sẏ an holten in muͦre(n) / wat(er)en in wẏschen an weyden an rychte hoghest vn(de) sydest . an pacht an beede an honren ed=/der wo dat ghe nomet sẏ vn(de)meynliken wes he(n)neke dotenberch in deme ghuͦde had heft / vn(de) vn holde mẏ vnde mẏne(n) erue(n) dar altes nycht ane vor vyfhuͦndert mark pe(n)ni(n)ghe . mu(n)=/te dede ghenghe ys dẏ se mẏ buͦ reet vn(de) buͦ talet hebben tuͦ eyner nuͦghe eer desse bryf ghe . gheue(n) ys . Ok scal yk vn(de) wyl dat schykken dat alle dẏ ghene dẏ dar leen ynne hebben . dat / scholen vorlaten vor deme rade tuͦ grẏpesw(olde) vn(de) vuͦrder wor ẏt den vorb(enomede)n ratma(n)ne(n) nuͦtte / duͦnket . vn(de) yk vn(de) mẏne eruen scholen vn(de) wẏllen en vn(de) ere(n) nakomelẏnghen dẏ vorb(enomede)n tuͦ . / behorẏnghe vn(de) rente vrẏen van aller ansprake . vd ghe nome(n) dat vor desser tẏt vor koft vn(de) / vor settet yd dat scal stab tuͦ erer lozẏnghe vn(de) dar en buͦholde ẏk mẏ nẏcht ane . vn(de) scolen sẏ scadelos holden van alle den ghenen dẏ zyk wellen an rechte nuͦghen laten vn(de) zuuͦderghen dat / Bertram dotenberch dat scal vor laten em tu der hant bẏ(n)nen deme neghesten yare . vn(de) de de he / des nicht so wyl ẏk vn(de) scal syn hetelke vyant werden vn(de) nu(m)mer syn frunt he en hebbe erst / dat vorb(enomede) ghuͦd em vor laten vn(de) dyͤ wẏle ẏk syn vyant byn so scal der stad vn(de) deme rade vn(de) / den borgh(er)n tuͦ g(ri)pesw(olde) open stan wes yk y(n)ne hebbe van sloten . Ok wyl yk vn(de) scal den vorb(enomede)n rat=/ma(n)ne(n) enen ope(n)ne(n) brẏf schẏcken van her marquart dotenb(er)ghe deme prest(er)e vn(de) cord dote(n)berghe / de he(n)neke dotenb(er)ghes zone synt dat sẏ dessen vorb(enomede)n kop scholen vuͦlborden vn(de) stede holden / vn(de) scholen vppe dat vor be nuͦmede guͦhd nu(m)mer mer saken vn(de) we(n)ne mẏ de rad tu g(ri)pesw(olde) / dar tuͦ eschet dat ick bertram dote(n)berghes vyant wesen scal . alzo hyr vore screue(n) ys so scal / de rat tuͦ grẏpesw(olde) mẏ wedder antwerden den ande(re)n brẏf den yk vn(de)myne louere gheue(n) / hebben vppe de vyfhundert mark pe(n)ni(n)ghe . de bryf scal denne loz wesen . alle desse stucke loue yk van myner vn(de) myner erfname(n) weghen den vorben(omeden) borghermeste(re)n ratma(n)nen / vn(de) meynheyt der stat tuͦ g(ri)pesw(olde) stede vn(de) vast tuͦ holende ane jengherleye weddersprake / hulperede edder arghe lyst tuͦ tughe dess(er) dynk ys mẏn inghezeghel henghet vor dessen / bryf de gheue(n) ys na ghodes bord drutteynhundert Jar in deme een vnde achtenẏ=/ghesten Jahre an demke auende sunte symons vn(de) Jude der hylghen apostope thuͦ deme / G(ri)pesw(olde) thughe desser vor screuenen sake sẏnt hẏnryk lussow de wonet tuͦ Sultzowe . cla=/wes . he(n)ny(n)gh vnde gherlach bruͦde(re) heten luͦssow de wone(n) thuͦ candelyn . b(er)told smalenze / de wonet thuͦ der swinghe(n) . hynryk benekenhaghen de wonet thuͦ deme beneken=/haghen vn(de) mer lude de ere werdigh syn