Vor al de ieghen de dessen bref zeen edder horen lesen . beke(n)ne ik hennẏngh bere dede wonet tho / mirsow . vnde mẏne rechten erfnamen dat wẏ hebben vor koft den erliken luden her hinrick / stuppellenberghe her ma(thi)as leuenhaghen vnde her Joha(n)n lowen . vorstendere(n) tho zu(n)te jurien vor / dem Grypeswolde tho der hand den elenden tho deme zuluen zu(n)te jurien dordehalue mark / renthe dede het bede in deme dorpe tho sansten de ze alle iar nu boren scolen tho zu(n)te mẏcheles / daghe de nuͦ tho kome(n)de is . vnde vortmer tho allen iaren . de dar na volghen . vt deme houe dar / drewes bloker ane wonet . veer vnde twintigh schillinghe . vnde vt heẏne wolgastes houe achte schil=/linghe . vnde ut deme houe dar hennẏngh herme(n)s moder y(n)ne wonet achte schillinghe . desse dorde=/halue mark renthe vorebenomed dar is vore ghegheuen vn(de) is ghekoft . vor twintigh mark su(n)desch / de mẏ hennẏngh bere voreb(enomed) reddeliken . wol betalet zint mẏt reden pennẏnghen . vortm(er) scal ik / hennẏngh bere voreb(enomed) vn(de) mẏne rechten erfname(n) . den wedder kop dar ane hebben v(m)me also / vele pennẏnghe also hir vore screuen steit vnde we(n)ne ik hennẏngh bere voreb(enomed) edder mẏne / erfnamen desse vorebenomede renthe . willen wedder kopen van den voreb(enomeden) vorstendere(n) . edder / van eren nakomelinghen dat scole wẏ en eẏn half ẏar . vore tho zegghen . vn(de) scolen en wedder / gheuen twintigh mark su(n)des . mẏt der renthe by(n)nen der muͦre tho deme Grẏpeswolde zu(n)der /Jenergherleẏe togheringhe vppe su(n)te merthens dagh .. vortm(er) zo loue ik hennẏngh bere voreb(enomed) / vnde mẏne erfname(n) . We(n)ne de vorstende(re) . van su(n)te Jurien voreb(enomede) . edder ere nakomelinghe . vs af / borede su(n)der jenegherhande argelist . vn(de) tho ener betughenisse hebbe ik hennẏngh voreb(enomed) mẏn / Jnghezeghel ghehenghet vor dessen bref . de gheuen vn(de) screuen is na godes bord . tho deme / Grẏpeswolde . dusetn iar drehu(n)dert ẏar indeme twe vn(de) achtighesten ẏare des du(n)nerdaghes / vor Vastelaue(n)de