Jn godes namen amen . Wẏ johannes Abbet . Petrus prior . hermann(us) vnderprior Eckhardus . Joh(ann)es van der / kemerntze . herma(n)n(us) nẏenkerken . herma(n)n(us) zeleghe . herma(n)nus bruͦnsow . hermann(us) kunrow . hinricus boldeẏr / johannes warne . marquardus ghẏse . joh(ann)es strokerke monneke dude oltheren des closters tho der eldena . vnd(e) / dadt gantze couent heren vnd brodere des suͦluen closters bekenne(n) vnd bethuͦgen openbar an desseme ẏe/ghenwordeghen breue wo de erlike vader in ghode vze here her phẏlippus biscoop van camẏn heft an / ghezeen de twedracht de thuͦschen vns vnd(e) vnzeme clostere vore benomet tho der eldena van der / enen weghene . vnd der staat tho deme grypeswald van der anderen weghene ẏs gheweset vmme / der pale wẏllen de zee ghestoot hadden bẏ deme bolwerke thuͦ deme clostere woort an deme reke . / vnd vppe daat . daat de twedracht worde ghebleghen zo heft he ghesant vze here de byscop vore be/nomet twe erbare doomheren wan van camẏn vte sẏme capittele . alze her phẏlippu(m) van helpte / archẏdẏaken van vͦznẏm . vnd her hennẏngh glazenape scholasticum daar suͦlues thuͦ camyn . / de an ghezeen hebben de nuͦttecheẏt vses closters thuͦ der eldena vnd ok der staat thuͦ deme grypes/wolde . vnd hebbent vntscheden na v(n)ser beẏder vulboord an desser mate . daat wẏ van vnser vnde / vnses closters weghene scholen guͦnnen der staat thuͦ deme gripeswolde pale tho stodende bẏ beẏ / den ziden des bolwerkes van deme houede ener dele van veer vnd twẏntich boten lank . nicht thuͦ / hẏnderde de rechtecheẏt vses closters men dorch willen wedder tho bewẏsende vns vnd(e) vseme / clostere . hirmede schal nemende zẏne rechtecheẏt zẏn ghebroken de wẏ an beẏden tzẏden / hebben . ẏd sẏ an rechten reddeleken breuen . ẏd sẏ an rechter reddeliker besittẏnghe . ẏd sẏ an rech/ter reddeliker bewẏsinghe edder an ẏeg ẏeneghen dẏnghen . men vast an eren stuͦcken thuͦ / blẏuende . vnd daar mede scal wesen gheleghet alle twedracht de ghewesen ẏs tuͦschen vse/me clostere vnd(e) der staat thuͦ deme gripeswolde also daat wẏ an beẏden tziden scholen holden / alle dẏnk also ẏd heft ghewesen van oldes . vnd vnser een den anderen vorderen scaal vnd(e) / eren wor he kan vnd(e) mach . Tho ener bekantnisse alle desser vorescreuener dẏnk zo hebbe / wẏ vnse ẏngheseghel vnd(e) vnses couentes . mẏt den ẏngheseghelen der erbaren heren her / phẏlippus vnd(e) her hennẏnghes vore benomet ghehenghet vor dessen breef . De gheuen / vnd(e) screuen ẏs na godes boord druͦtteẏnhundert ẏaar . an deme dree vnd(e) achtegesten jare / An suͦnte Lucas daghe des hilghen ewangelisten etc.