Jn ghodes namen amen vor alle den Jenen de dessen breff zeen edder horen lezen bekenne ẏk hen(n)ingh / wampen van mynes wyues weghene de een dochter ys her peter bretekowe(n) ra(a)tman(ne) by zyme leue(n)de / thuͦ(m)me g(ri)peswolde deme ghod gnedẏch sẏ vnde ẏk herman bretekow een zone des sulue(n) her peters / dat wy myt wolberadenen muͦde myd vulbord alle der Jenen der ere vulbort thuͦ desser na screuen / sake thuͦ eschende vnde thuͦ hebbende was vredelken vn(de) rechtlyken vor koft hebben vnde ghe lathe(n) vn(de) van vzer erfnamen vnde nakomelynghen weghene vor kopenen vnde lathen an desser Scrẏft den / erlyken buschedene(n) . mannen den Ratma(n)nen der Stad g(ri)peswold vnde den armen in deme ghodeshuse / des hylghen ghẏstes vor der stad g(ri)peswold , den armen thu der hand be huͦf vnde mitlycheẏd ¹ twyntẏch / hunere vnde enen dach deenst(e) an deme dorpe thuͦ ane olden kerkdorpe an eme kochen . vn(de) van syner / thuͦ beherynghe dar nuͦ ane wont vnde buwet clawes vytte theyn hunere vn(de) ene(n) dachdeenst vn(de) van / ener kochen wuͦrt de nuͦ buwet clawes wedeghe teyn huͦnere alle gar vp thuͦ borende vnde thu entfan=/ghende vp sunthe mertens dach des hylghen byscopes vn(de) vredelken thuͦ ewyghen tyden thu besyttende / alzo alze vze vader vnde voruaren de twynthych huͦnere vn(de) den dach deenst besetten heft vn(de) vs / ghe eruet vnde lathen heft vnde beholden vs vnde vzen eruen dar altes nẏcht ane de twyntich yth hynere / vnde den dach deenst hebbe wy he(n)ny(n)gh vnde herman van vzer vn(de) vzer erfname(n) vn(de) nakomelynghe(n) / weghene den ratma(n)nen der stad g(ri)peswold vorben(omede) vn(de) den armen vorb(enomeden) vs he(n)ny(n)ghen h(er)ma(n)ne / ghetalet vnde thuͦ ener ewighe betalet hebben eer desse breff ghe gheuen redelken vorlathen Thuͦ / merer bewarynghe vnde bekantnisse zo hebbe wy he(n)ny(n)gh vnde herman vorben(omede) vanvzer vnde vzer / erfnamen weghene vze Jnghezeghele mẏd ghuͦden wyllen mẏt gantzer wytscop vnde vordanken / henghet vor dessen breff De gheuen vnde screuen ẏs thuͦ me g(ri)peswolde na ghodes bort drut=/teynhundert jar In deme veer vnde neghentyghesten Jare des hylghen apostels daghe Sunte / thomas