Wy borgermestere vnde Ratmanne to dem grypeswolde bekennen vn(de) bethuge(n) openbare / an dessem Jegenwardygen breue vor allen luden de ene zen vn(de) horet lezen dat wy hebbe(n) enghe=/dreghen myt den steden Stralessunde vnde Tanglyn alzo v(m)me de muͦnte to slande in vns / dren vorscr(euen) steden nach der wẏse alze hẏr na screuen steẏt To deme ersten dat de gewe=/ghene mark schal hebben twelp loot an zuluere vn(de) in deme talle ses vn(de)vertych worpe / edder seue(n)vertighesten haluen worp vn(de) Jo nicht mer vnde der cleynen pe(n)nynge schal / hebben de ghe weghene mark achtede halue loot an zulu(er)e vn(de) ver mark vn(de) veer schylly(n)ge / an dem talle . Ene yewelke stat vorscreue(n) schal slan ere sunderge teken dar ane ere / muͦnte bẏ benne . vortm(er) ene yewelke stat schal setten twe ut ereme Rade de dat lauen / dat me yd alzo holde alze vorscr(euen) steẏt w(er)et dat dess(er) stede welk dẏt breke de schal den hamer / ganslyken lygghen lathen vn(de) schal nichtes slan de wyle dat desse endracht waret vort =/mer wor me dess(er) dryer stede gheld an kuͦmpt dar schal me dat prouen vortm(er) schal / ene yewelke stat alle andere gheld vorbeden alze dat in dessen dren steden nicht ge=/slaghen ys Vortm(er) schal ene yewelke Stat vorbeden bẏ liue vnde bẏ gude dat nẏn / muͦnter Schychter edder ghold smẏt edder anders (n)ynmede he zu we he zu desser / drẏer stede muͦnte schal mede bernen Vortm(er) dat (n)ynment dess(ir) dryer stede gheld dat beste / ut sochte vn(de) de muͦnte dar mede vor ergherde vn(de) dat vtsvchten gheld kofte edder vor=/kofte de schal dat don vp zyn hogheste desse endracht schal an stan nu to sunthe / micheles daghe alze desse breff gegheuen ys vn(de) schal waren en gantz iar v(m)me . / To tughe dess(er) vorscr(euen) stucke hebbe wy vns(er) stat secret(um) gehengh(et) lathen vor dessen / breff gegheuen vnde screuen to dem g(ri)peswolde na ghodes bord drutteyn huͦndert yar / dar na an dem vyue(n)neghentyghesten yare In der hochtyd sunthe micheles des ertzen=/enghels