Jn godes namen amen vor allen cristen louueghen luden de dessen bref zaan edder horen lesen Bekenne jk / michel horne wulf hornes sone wanaftich to pardessin . dat ik myt wolbedachten muͦde vn(de) willen / vnde vulbort myner rechten eruen vnde neghesten vrunt sunderlik myt vulbort myner vedderen to / eneme eweghen vorkoften kope vorkoft hebbe vnde vorkope vorlaten hebbe vnde vorlate myt macht / desses breues deme erbaren manne her Bernd vlephe ratman tome grypeswolde vn(de) synen rechten / eeliken eruen myne twe houe to grotenkysow alse den hof den nu hinric / vole ynne wanet vn(de) den anderen hof dat nu ebel voreman jnne wanet myt alle den huuen vn(de) tobehorunghen desser / houe alse ackers wyske mure dike watere waterlope weyde vnde myt aller holtanghe de jk hebbe / hat vn(de) hebbe vppe der veltmarke to grotenkysow sunderlike dat holt dat dat het de kattenstrett . / mit alle deme dat to den vorben(omeden) houen vn(de) huuen licht vn(de) van oldinghes to ghe leghen heft edder / toligghen mach benomet vnde vnbenomet vnde allen eghenduͦmden jk dat jnne hat hebbe mit / aller herlicheyt mit richte vnde denste myt deme hoghesten vnde sijdesten vn(de) my(n)nesten rechte an hant / vn(de) an hals mit aller vrigheit alse id myne olderen vor my vnde ik na dat vrigest vn(de) eghenst beseten / vnde bruket hebben ewicliken vredesam van eruen to eruen to besettende . dat he my an ghuden reden / sundeschen pe(n)ni(n)ghen vore gheuen heft an eme su(m)men twee hundert mark vn(de) veer vnde souentich m(ar)k / eer der makunghe desses Breues vnde ik hebbe dyt ghud her Bernde vn(de) synen eruen vorlaten erue / vn(de) lien vor vnsen heren des landes vnde beholde my vnde mynen eruen nichtes macht an deme vorben(omeden) / ghude vnde wes jk hat hebbe to kisow vorben(omede) vn(de) vp der veltmarke dar sulues dat hebbe jk her bernde / vn(de) synen eruen to eme eweghen vorkoften kope verkoft vn(de) vorlaten vnde jk efte myne eruen scholen / myne losinghe hebben an deme vorscreuen ghude vnde jk myt mynen eruen willen her Bernde vn(de) synen / eruen dessen kop vnde des ghudes waren vn(de) entfrigen van aller ansprake vn(de) manynghen van alle / den jenen de syk willen an rechte nughen laten wenne vn(de) wo vakene wij dat to esket werden vnder vnsen / kopen vn(de) retinghen vnde wat pacht an dessen houen vor settet is de mach her Bernd vn(de) syne eruen / losen na lude der breue de dar vp synt vor seghen Alle desse stucke vn(de) eyn jewelk by syk loue ik michel / herne myt mynen eruen an ghuden truwen to holdende sunder arghelist vnde gheue met alle recht ghestlik / vnde werlik dar me dessen bref mede breken mochte To groterer tuchnisse desser vorscreuen dynk so / hebbe jk michel vor my vn(de) myne eruen myn jngheseghel laten henghen an dessen bref ok to ener tuchnisse / alle desser dynk so hebben de erbaren ma(n)ne alse her jehan meybom her johan phedynk her ghert dore=/man vn(de) her jacob quant ratma(n)ne tome grypeswolde v(m)me mynen bede willen ere jngheseghele mede hen=/ghet an dessen bref Gheuen vn(de) screuen to gripeswolde in den jaren unses h(er)en verteynhundert jar dar na / an deme souenvndeverthegesten jare des neghesten daghes na sunte mathias daghe des hilghen apostels