Jk Hinrik rubenow lerer des / keyser rechtes wilkorde richter vn(de) vruntlike vorscheder in der sake de dar / hengh(et) vor deme Rade tome G(ri)pes(wolde) tuschen B(er)teld bruk(er)e va(n) siner erlike(n) / husurouwe(n) wegh(e)n anclegher va(n) der ene(n) zide vn(de) Clawes luder antwerdes-/man va(n) der and(er)en zide alze va(n) ichtwelker vorlatinghe wegh(e)n dede Clawes / bertelde scholde ghelauet hebbe(n) to dunde dar sick Clawes wedder ane / meͤnde to behelpende dat hee dat lofte an siner vnmu(n)dicheyt sunder / siner vormu(n)d(er)e vulbord ghe daͤn hadde wo sick de(n)ne dat vorlope(n) heft / an beẏder zide dar will ik neͤn recht up sp(re)k(en) wente ik ere bewisinghe / an beẏder zide nicht ghehord ofte ghezeen hebbe Men vor leue my(n)ne vn(de) / fru(n)tschop alze de ok oppe my ghesettet is so sp(re)ke ik vth an de stede des / rechten dat Clawes va(n) siner vn(de) alle siner erue vn(de) nakamelinghe wegh(e)n / to deme negheste(n) dink daghe edder to dem(e) and(er)en vnuorsumet wen de / rad hijr to dem(e) G(ri)pes(wolde) vp dat huͤs gheyd . schal de sulue vorlatinghe dar / ene b(er)teld vor deme rade v(m)me beclagh(et) heft noch doͤn vorder b(er)teld(e) vn(de) alle / sine(n) erue(n) vn(de) nakamelinghen to ewigh(e)n tide(n) vordregh(e)n vor deme rade / alle maninghe de hee moge to em hebbe(n) va(n) siner grotmud(er) erue edd(er) / va(n) ichteswelke(n) and(er)en saken se sin wodane se sin hyr wedd(er) entjegh(e)n / so schal em b(er)teld nu vppe den negheste(n) winachte(n) xx sundessche m(a)rk / vn(de) vppe den negheste(n) paschen ok xx Sundessche m(a)rk wol to danke vn(de) / to ener noghe gheue(n) berede(n) vn(de) betalen v(m)me sundergher vru(n)tschop / vn(de) leue willen vn(de) erer eͤn schal de(n) and(er)en ere(n) vn(de) vord(er)en an rechte(n) / loue(n) vn(de) truwe(n) to sik dat an vru(n)tschop to behord vn(de) welke(r) dat god / vorbede de desse vorsc(re)uen articl(en) alzus nicht enhold de schal vorualle(n) / sin an ener pine Ducent sundesscher m(a)rk dar my de helfte schal / af to kame(n) vn(de) de helfte der dele de dat gherne holden will vn(de) oft / hyr an Jchteswelke(n) tide(n) Jenigherleye vnwille tusche(n) b(er)teld vn(de) Clawes / va(n) desser sake wegh(e)n dat god vorbede wedd(er) vp stunde so beholde ik / my nu Jeghenwardelik bi desser sulue(n) pine de macht de wile ik / mit em na godes wille(n) leue den vnwille(n) gutlike(n) tuschen en na / vthwisinghe desser vorschedinghe wech to legghe(n)de vn(de) to entvlige(n)de / vn(de) desse sulue sc(ri)ft schole(n) zee va(n) worde(n) to worde(n) an beyde(n) ziden vp erer / beẏder kost laten sc(ri)ue(n) an d(er) stad grote buͤk Des to merer orku(n)de / so hebbe ik twe sc(ri)fte ene vth der anderen snede(n) allens lude(n)de en beyde(n) / mit mine(m)me Jngheseghelle vorsegheld vorantwerd(et) na godes bort mcccc / darna i(n) dem(e) xlviij jare des ma(n)daghes na d(er) hemeluard d(er) Ju(n)cfru/wen marien