Jk Hinrik Rubenow lerer des keyserrechtes wilkorde richter vnde vruntlike vorscheder in der sake de dar henghet vor deme Rade tome Gripeswolde tuschen Berteld Brukere van siner erliken husurouwen weghen anclegher van der enen zide vnde Clawes Luder antwerdesman van der anderen zide alze van ichtwelker vorlatinghe weghen dede Clawes Bertelde scholde ghelauet hebben to dunde dar sick Clawes wedder ane meende to behelpende dat hee dat lofte an siner vnmundicheyt sunder siner vormunder vulbord ghedaen hadde Wo sick denne dat vorlopen heft an beyder zide nicht ghehord ofte ghezeen hebbe Men vor leue mynne vnde fruntschop alze de ok oppe my ghesettet is so spreke ik vth an de stede des rechten dat Clawes van siner vnde alle siner erue vnde nakamelinghe weghen to deme neghesten Dinkdaghe edder to deme anderen vnuorsumet wen de Rad hyr to deme Gripeswolde vp dat Hues gheyd schal desulue vorlatinghe dar ene Berteld vor deme Rade vmme beclaghet heft noch doen vorder Bertelde vnde alle sinen eruen vnde nakamelinghen to ewighen tiden vordreghen vor deme rade vmme beclaghet heft noch doen vorder Bertelde vnde alle sinen eruen vnde nakamelinghen to ewighen tiden vordreghen vor deme Rade alle maninghe de hee moge to em hebben van siner grotmuder erue edder van ichteswelker anderen saken se sin wodane se sin Hyr wedder entjeghen so schal em Berteld nu vppe den heghesten Paschen ik xx Sundessche mark wol to danke vnde to ener noghe gheuen bereden vnde betalen vmme sundergher vruntschop vnde leue willen vnde erer een schal den anderen eren vnde vordern an rechten louen vnde truwen to sik dat an vruntschop to behord vnde welker dat god vorbede de desse vorscreuenen articlen alzus nicht enhold de schal voruallen sin an ener pine Ducent sundesscher mark dar my de helfte schal af to kamen vnde de helfte der dele de dat gherne holden will vnde oft hyr an ichteswelken tiden jenigherleye vnwille tuschen Berteld vnde Clawes van desser sake weghen dat god vorbede wedder vpstunde so beholde ik my nu jeghenwardelik bi desser suluen pine de macht de wile ik mit em na godes willen leue den vnwillen gutliken tuschen en na vthwisinghe desser vorschedinghe wech to legghende vnde to entuligende Vnde desse sulue scrift scholen zee van worden to worden an beyden ziden vp erer beyder kost laten scriuen an der Stad Grote buek Des to merer orkunde so hebbe ik twe scrifte ene vth der anderen sneden allens ludende en beyden mit minemme Jngheseghelle vorsegheld vorantwerdet na godes bort mcccc darna in deme xlviij jare des Mandaghes na der hemeluard der Juncfruwen marien