In deme name(n) godes amen . Ik hinricus Rubenow lerer des werliken rechtes vn(de) Borg(er)mest(ere) to(m)m gripeswolde vor my vn(de) myne erue(n) Beke(n)ne vn(de) betuge apenbare i(n) dess(e)m brefe / vor alle de(n) ẏenne(n) dede enen zeen edder hore(n) lese(n) . dat ik wolbedachtes muͮdes na rẏpeme rade vn(de) gud(er) vulbort mẏner negeste(n) vrund vn(de) alle der jenne(n) der ere vulbort / dar mede to esschende was hebbe recht vn(de) reddelk(en) vorkoft vn(de) vorlate(n) . vorkope vn(de) late Jegenwerdich i(n) dessem brefe to ene(m) ewige(n) stede(n) vnd(e) vaste(n) kope . deme / erlike(n) ma(n)ne her(e)n Alff greuerade(n) Radma(n)ne tom(e) Sunde sýne(n) rechte(n) erue(n) vnd(e) nakomelinge(n) vor elue(n) hundert sundesch(er) penninge . dede ik va(n) em rede vp / gebovet vn(de) ent fange(n) hebbe er der makinge desses brefes den gantze(n) schone(n) hoff mit alle sẏne(n) tobehoringhe(n) mit aller rente vnd(e) pacht dat sẏ an korne / edd(er) an pe(n)ningen mit ackere gebuwet vnd(e) vngebuwet vnd(e) den me(n) noch buwe(n) mach . mit wissche(n) weẏde holte(n) struke(n) bussche(n) . more(n) torfe . watere / lopende vnd(e) stande Seen diken afulote(n) vnd(e) toulote(n) mit stige(n) wege(n) vnd(e) vnwege(n) bret vnd(e) smal . mit aller vrigheit vnd(e) rechtich(eit) . mit alleme richte vn(de) / rechte . mit deme hogeste(n) vnd(e) sẏdeste(n) rechte(n) . an hals vnd(e) an hand to richtende mit denste mit bede . mit aller nut vnd(e) vrucht de dar nu ane is vnd(e) noch / ane werde(n) mach tokome(n)de(n) tide(n) benomet vnd(e) vnbenomet alse he nu licht vnd(e) je va(n) oldinghes vth geleghe(n) heft . alse qwijd vnd(e) also vrijg alse mẏne / voreuare(n) vor(en) vnd(e) ik na de(n) vor(e)sechte(n) hoff mit alle sẏner tobehoringhe aller vrigest vnd(e) hogest gebruket besete(n) vnd(e) gehad hebbe(n) na vtwisinghe lude / vnd(e) ẏnneholde der besegelden brefe . de ik here(n) alfe dar up vorantwordet hebbe . mẏ vnd(e) mẏne(n) erue(n) in deme vor(e)sechte(n) hofe vnd(e) alle sine(n) tobehoringhe(n) / nichtesnichtes to beholdende Noch va(n) gnaden beden edder van rechte Men allent wes ik mit mẏne(n) erue(n) vnd(e) vor(e)uare(n) dar ane gehad hebbe(n) dat geue wij / mechtichliken ou(er) vn(de) vorlatent gantz vnd(e) all an de(n) vorben(omeden) heren Alfe . sẏnen erue(n) vnd(e) nakomelinge(n) vnd(e) setten se hir mede in kraft desses brefes in de / ware(n) rechte(n) besittinghe vn(de) in de handhebbenden were des vor(e)scre(ue)n hofes vnd(e) aller sẏner tobehoringe(n) . En de to ewige(n) tide(n) to beholdende to brukende vn(de) / vredesamichliken to besittende , vortan to vorgeue(n)de to vorkopende to vorwesselende mit aller vrigheit vnd(e) rechticheit vorscre(ue)n gantz edd(er) ey(n) deel vnd(e) dar / mede to donde alse en alder enenst vn(de) gedelikest is na ere(m) willen Vnde ik hinricus vorben(omeder) schal vnd(e) wil mit mẏne(n) erue(n) . her(e)n alfe sẏnen erue(n) vnd(e) na/komelinge(n) den vorscre(ue)n hoff mit alle sẏner tobehoringhe aldus vrijg vnd(e) qwijd vorlate(n) . dar wij des va(n) rechte plichtich sind to vorlatende vnd(e) ware(n) / en vore vnd(e) na des vorlatinge alse in deme lande en recht is . Vnde willen en de vorscre(ue)n gudere entvrigen vnd(e) entwere(n) vor alle ansprake hindernisse / vnd(e) beweringe aller p(er)sonen geistliker edder werliker se sẏn ok wol se sẏn dede vor recht kome(n) . recht neme(n) vnd(e) gheue(n) wille(n) weret ok sake dat hir / na in tokomen tiden Jenige brefe gevunden worden ludende vppe dessen vorscre(ue)n hoff vnd(e) sẏne(n) tobehoringe(n) gantz edder ey(n) deel . de scholen alle her / Alfe vorben(omeden) sẏne(n) erue(n) vnd(e) nakomelinge(n) vromelik wes(en) vnd(e) anders nema(n)de weret ok sake dat here(n) alfe vorben(omeden) sẏne(n) erue(n) vnd(e) nakomelinge(n) ere / pacht to rechte(n) tide(n) worden So hebben se alle ware vulkomen macht So vaken en des nōt vnd(e) behuff is de to pauende vt dem vorscre(ue)n hofe / vnd(e) alle sẏne tobehoringe(n) vnd(e) mit den pande(n) to vare(n)de alse pacht recht is . sunder Jenig(er)leẏe Jegenseegend ofte hindernisse va(n) Jeme(n)de . Alle vorscre(ue)n / stucke same(n)tlike(n) vnd(e) ey(n) islik bẏ sik loue ik hinricus Rubenow vorscre(ue)n vor mẏ vnd(e) mẏne erue(n) her(e)n Alff greuerode vor(e)secht sẏne(n) erue(n) vnd(e) ewige(n) nako/melingen in gude(n) truwe(n) stede vnd(e) vast wol to holdende sunder alle argelist , vn(de) hebbe des to groter tuchnisse vnd(e) vaster bewari(n)ge vor my vnd(e) mẏne / erue(n) mẏn Jngesegel mit witschop gehenget an dessen breff . den mede tor witlicheit alse mechtige tuge besegelt hebe(n) de Ersame(n) ma(n)ne Alse / h(er) Remund vo(n)negarue Radman tom Sunde her Clawes hagedorne vnd(e) mathias va(n) der lippe erfseten borger dar sulues Gescheen na godes bort / xiiiiC vnd(e) eenvn(d)veftich Jar(e) in Sunte Barbare(n) dage der hilge(n) Juncvrow(en) vnd(e) mertelerschen