Vor allen jenen , dar desse breef vorkumpt tho seende ofte tho horende , bekenne vnde betughe wy borghermestere vnde radmanne thom Griepeswolde , dat an vnser jeghenwardycheyt syn geweset de ersamen manne thuges vnde louen wolwerdych vnse leuen medekumpane alse herren Hinryck Rubenow , lerer des keyserrechtes , vnde Dyderyck Langhe , borgermeystere , vnde Gherd Dorman , radman , myt vns vnde hebbenmyt eren vpgherichteden vyngheren vnde vthghestrekkenden armen lyfachtyghen tho den hylghen swerende , alse recht is , nugaftighen ghetughet , dat , an der weke na Mitfasten nw vyllykes vorghanghen , see vppe der Wynburse tom Stralessunde an vnser bodeschap an jeghenwardycheyt mede der ersamen Hans Glynemann , borghermestere , vnde Laurentius Bokholtes , radmanne tho Anclam , vnde Hennynk Dumen , borgermeystere to Dymmyn , waraftyghen horden , dat her Otto Voghe , do tom Stralessunde borghemester , zede Hee wolde , wolde god , dem vorreder Hertoch Wartslawe nummer vor einen herren holden Dar em do her Rubenow vorbenomed an sede Hee scholde dat nicht segghen Dar he darop antwardede vnde zede Scholde hee des nw swyghen , hee hadde dat vor dusent luden vppe dem markede secht Vnd zede vort Wy hebben een privilegium dat wy moghen enen anderen herren nemen , wenn wy enen hebben , de vns vorwaldet velemer moghe wy ijd denne doen , wen wy enen hebben , der vns vorret . Vppe desse tuchnisse hefft vnse gnedige leue here Hertoch Wartislaff

vorbenomet den wy vnde vnse nabere alle danken aller ere vnde reddelicheyt , ghebeden vnser stad vorzeghelde touorzicht vnde lopenwerdyghen tuchbreef . Hyrume hebbe wy vnser stad hanghende inghezeghel henghet vor dessen breff , dede geuen vnde screuen ys tom Gripeswolde na gades bord veerteynhundert jar darna yn deme dre vnde veftygesten jare des achteden daghes Sunte Laurentis des hylghen mertelers.