Witlick zy alsweme dat Berteld Swarte eyn melerknecht heft ghewundet Peter Kock van der Eldenow desz Sundages Judica darumme isz he ghegrepen in desz Arsten husz Kysow vor den Voget ghebrocht myth Kock ok angeclaget dare ze van beyden parten synth ghegaen in de hechte ok beyde der Heren willen ghemaket na lude beyder gichtinghe Zo dat Berteld Swarte schal den heren in ere Kumpanie by dat Markt vp I lynwant in eynen baghen malen vp dat schoenste eyn Crucifix myth Marien vnde Jhesus sunder jennererleye togheringhe XIIII dage na Pasce Louers mester Ludeke Clawes Danckwert Dhosuluest quam syn kumpan Symon Hermensz vnde wolde ene myth walt van deme Richte nemen myth wapender hant ock vor de Badelighe dar he isz ouer bohardet vnde ghesettet [vmme] de walt dorch gnade der heren schal he en maken in de kumpanie I krone myth I Jurgen iserwerck wesz dare tohoret vp dat schonste quidt vnde vrich tuschen Pasce vnde pinxesten Louers vt supra Ock schal Berteld dat Richte in deme Lubescheme bolte ¹ nige vpmalen vpden vorscreuenen termin pinxesten Fideiusserunt mester Ludecke solus in presencia Johannis Smiterlouwen De vorscreuen kock Peter kock tore eldena heft ock broke anghewrocht Bertelt Swarten vorescreuen dar ze vnder sick malkander fruntlikerwysz in den hechten hebben entliken vlegen vnde schal den Heren gheuen VIII m(a)rc Sund(esch) IIII vp Pasce-Pinxesten IIII vp Jacobi wol botalt Louers Vrban Paneke Hans Vosz myth eyner samenden hant ock orueiden alle III alze Berteld Swarte Symon Hermensz Peter Kock na older woenheit in jeghenwerdicheit Clawes Danckwert mester Ludicke Hinrick Krullink Vrban Paneke Hans Vosz Actum tertia feria na Letare ofte desz Dinxestedages vore Ambrosi