JN no(m)i(n)e d(o)m(ini) Amen . Jk . Margareta van kamen eyne wedewe ludekens van kamen deme god gnedich / si bi suͦntheit vn(de) wolmacht van der ghnaden godes mẏnes lẏues , mẏner sinne vn(de) mẏner redeli=/cheit , weret dat ik storuͦe , mit ghantzer volbort vn(de) willen mẏner vormu(n)dere so sette ik aldus / mẏn testament . To deme irsten si witlik , dat mẏn rede ghut vn(de) wisse schult dat my ghot vorle=/ghen heft . rẏset vppe . neghen . hundert mark lub(esch) ¹ , behaluen mẏn inghedome , vn(de) cleynode vn(de) mẏn stan/de Erue , To den irsten gheue ik to der borch . ij . ghuldene . Jt(em) to deme hilghe(n) gheiste geue ik² . ij ghuldene / Jt(em) gheue ik to suͦnte katherine(n) . ij . ghulden Jt(em) to sunte Juryan den elenden zeken gheue ik . ij . / ghuldene Jt(em) to deme buwe to Cernety(n) gheue ik . v . m(a)rk . Vortmer si witlik dat ik gheue mẏner docht(er) / Elsebe der Closter vrowen to Cernetẏn . huͦndert mark lub(esch) mẏnes redesten ghudes mit den huͦn=/dert marken scolen er mẏne vormundere maken . x . mark gheldes i(n) deme rade to lubeke ofte wor it / se nuͮtteste duͦncket wesen , Jtem gheue ik er mẏne ghuldene hanttruwe . vn(de) dar to gheue ik er iiij . / sulueren lepele . Jt(em) mẏne andere ghuldene vingheren . scolen Taleke vn(de) Margareta mẏne døchtere / lẏke vnder sik deẏlen , Jt(em) gheue ik Taleken vn(de) margareten von¹ beẏden mẏne boldeke(n)s kolten , vnde / mẏne weghen kolten . vn(de) . j . par schirer lakene dit scolen se like vnder sik deẏlen . Vortmer gheue ik / myner vorbeno(m)ede(n) dochter margareten to voren vth , alle mẏne inghedome , vn(de) alle mẏne sulue=/ren taffelsmide vn(de) alle mẏn Cleynøde dat si ghulden ofte sulueren , des ik to mẏner personen aldus / langhe ghebruket hebbe , vn(de) gheue er dar to , to voren , alle mẏne varende haue , Jtem gheue ik / Johannese van halle mẏnen grotesten ghuldenen boͦch . vn(de) de andere . iij . ghuldene boghe gheue ik / luͦdeke mẏme sone . vn(de)*gheue eme dar to alle sines vader Cleẏnode Jtem gheue ik wobbeke(n) Eẏler iar=/chowen dochter , der moder ludekens suster was van kamen . x . m(a)rk . Jtem alle mẏn ander ghuͦt . / weghelik vn(de) vnbeweghelik , welker leye dat is , gheue ik ludeken mẏme sone , vn(de) margareten / mẏner dochter , To alle dessen vorbenomeden saken kese ik , vn(de) sette mẏne vormuͦndere . Johan / koningh darquarde . vn(de) herman lẏpenzee , mẏne swagheres . Ghereke van der lippe . Johanne / wisscher . vn(de) Johanne hassen . Alle desse vorschreuene stucke wille ik holden stede vn(de) vast also la(n)=/ghe bit jk se openbarliken wederspreke . Gheschreuen na godes bort do men screif . Drutteẏne hundert / vn(de) twe iare vnde seuentich , Jn sunte Jurianes daghe . Her Herman Osenbrugghe ³ vn(de) . her Ghert / van Atendorne Raatmannes to lubeke sint thughe to desseme testamente