JN godes name(n) Amen Jk heẏdeke van helmstede en borgher tuͦ lubeke medemechtich mẏnes danken vn(de) mẏnes lichames vn(de) mẏner / redelicheẏt bẏ mẏner wolmacht ghande vn(de) stande is dat ik den dot vore kome(n)de bin so schicke ik mẏn testament tuͦ deme / ersten aldus , Jk gheue heẏdeken mẏme sunderghen kinde , edder sone viij m(a)r(k) lub(esch) . vortm(er) gheue ik heẏdeken mẏner moder / brodere iiij m(a)r(k) vn(de) mẏnen besten rok . Vortm(er) gheue ik mẏme wiue taleken vn(de) mẏme kinde al mẏn guͦd id zi beweghelik / edder vnbeweghelik . half vnde half vnder sik tuͦ delende , tuͦ voren scal mẏn wif taleke beholden ere kisten vn(de) ere kled(er)e / vn(de) spanghen vn(de) bretzen also se dat heft tuͦ erme behof vortm(er) wil ik dat , weret zake , dat , dat kint storue er dat / muͦndich worde , so scolen mẏne vormu(n)d(er)e des kindes guͦd gheue(n) inde ere godes , dar id en euen kuͦmpt vn(de) alder / nuͦttest is , vortm(er) were dat zake dat mẏn wif sik vor anderde , so scolen mẏne vormu(n)d(er)e des kindes guͦd tuͦ sik neme(n) / vn(de) scolent dar van vor stan also dat deme kinde nuͦtte is , vortm(er) so wil ik dat , dat mẏne vormu(n)d(er)e scolen gheuen / Her Johanne van Criwitze alle iar ene m(a)r(k) lub(esch) . van der huͦre dor mẏner zele salicheẏt , de wile dat de vormu(n)d(er)e / des huses mechtich sin van des kindes weghen , vortm(er) gheue ik tuͦ weghen vn(de) tuͦ steghen viij sol(idus) . Alle desse / vorscreuen stuͦcke wil ik stede vn(de) vast holden , also langhe beth ik se mẏd leue(n)digher stempne vn(de) openbar / wedder spreke, [...] ¹