JN godes namen amen . Jk Hannes Eghof mechtich mẏn(er) synne vnde mẏner Redelicheyt Jss(et) dat ich vor/wu(n)nen werde van den dode . So make ik my(n) testament in desser wijs . Tho den ersten male gheue yk / to weghe vnde to steghe to betherende . x . s(chillinge) lub(esch) . vortm(er) gheue yk to vnser vrowen to lub(eke) . ij . / m(a)r(k) lubesch dat man mẏn(er) denke van deme predeker stole vn(de) bidde vor my(n) zele . vortm(er) gheue yk / to me hilgen geste to lubeke . xx . s(chillinge) lub(esch) den seken in de hant to gheuende . vortm(er) gheue yk tho / sunte katherẏnen vnde to der borch to lubeke jewelkeme closter . j . m(a)r(k) dat ze mẏn(er) zelen denken / vortm(er) gheue ik mẏn(er) groten moẏmen . iiij . sware gulden weret dat ze storue ere yk so schal / man sy gheuen in de kerken to staden dar my(n) vader grauen licht dat man mẏn(er) denke vnde / bidde vor mẏn zele . vortm(er) gheue ik mẏns broder sone hansekin Eghof , de to lub(eke) boren is / my(n) grote syluere(n) gordel vnde weret dat de junghe storue de wile ich vthe we(re) So scal man dat / gordel vor kopen vnde scal dat gelt dat dar van wirt sin(er) moder half gheuen vnde de ander helfte / mẏner suster dochter metteke . vortm(er) gheue ik deme suluen hansekin mẏne kisten vnde noppen / sak vn(de) vilt vnde mẏne korten clede(re) alto male . vortm(er) gheue ich mẏme Swagher hanse puppen / to derbete mẏne andere(n) clede(re) alto male de to mẏme liue behoret vnde my(n) harnesch . vortm(er) geue / yk my(n) luttige suluere(n) gordel metteke hans puppen wiue . vortm(er) so gheue yk metteke mẏn(er) suster / dochter my(n) grote P(ate)r n(oste)r mit deme guldenen cruce . jt(em) so hanget an deme pat(er) n(oste)r j Juries / bilde dat gheue ich Tideman nagels vrowen . vortm(er) hanget ok an deme p(ate)r n(oste)r en marien / bildekin dat gheue ich tideman ty(m)mermans vrowen . vortm(er) gheue yk lomeghowen en clene / guldene boẏch dat hanget ok an deme p(ate)r n(oste)r . vortm(er) gheue yk en boyk het der zelen trost / hermen van Essen mẏneme neven . vortm(er) gheue yk siner suster heẏnemans vrowen vanme / nẏenlo en gulden vingerlin dar steyt en saffeir jnne . vortm(er) gheue ik tideman nagel enen / schoet tho ener platen . vortm(er) gheue yk mẏn(er) suster docht(er) metteke en vingherlin dar de / dẏemant jnne steyt . vortm(er) gheue yk ok der suluen metteke mẏn(er) suster docht(er) al my(n) ander / ghud dat hir en bouen is Dat zij beweghelik edder vmbewegelik Dat sij welker leye dat id / sij Alle desse vor scr(euen) stucke holde yk stede vnde vaste wente also lange dat yk ze openbare wed=/der rope . Des kese yk to vormu(n)dere Tẏdeman naghel . Tydeman ty(m)merman . hans lemegow / Dat jegheuen is in den jar godes dusent drehundert in den seuen vnde achtentigesten jare / vp sunte Jacobes auͦent des hilgen apostelen . Des sint tughe her Johan nẏebuͦr vnde her / hermen yborch Raedlude to lubeke .