Witlik si Dat her Johan pertzeuale . Her Gozswijn klinghenberch vnde Gherd voghed / van Hermans weghene van alen op de eyne side Her Godeke trauelman . Her Hinrik / westhof vnde her peter van hereken van Sẏmons weghene van de(m) kile van der andere(n) / siden ghedeghedinghet hebbe(n) also hir na ghescreue(n) steẏt . Dat herma(n) van alen seggen / scholde vnde gheseghet heft vor den vorghesprokene(n) deghedinghes luden vnde vor / vele andere(n) bedderue(n) luden beẏde i(n) deme Rade to lubeke vnde buten dem rade . De / dar to ghebeden weren an beẏdent siden . jnt erste seghede Herma(n) van alen vorghe/screue(n) Sẏmon dat gheschach . Dat jk willen hadde to ridene van Reuele to darpte / Des wart mi ghelt ghedan an golde Dat jk scholde bringhe(n) to Darpte Dat / yeghendet sik also . Dat mi de wech so quaet dochte . Dat jk to Reuel weder in reẏt / Sẏmon do quemestu to mi in mine herberghe vnde bedest mi willekome wesen / Sẏmon Do dede jk di ghelt an golde . Dat du scholdes bringhe(n) in dine herberghe / vnde antworde(n)t Marquarde sule Were he nicht dar¹ to huͦs . so scholdestu dat antwor=/den siner werdinnen . Dat heuestu ghedan . nv is dar ghelt van verloren . also men / seghet . Des en tẏe jk di nicht vnde en teghesti nẏ werlde wante jk en weẏt / van di anders nicht vnde van alle diner handelinge dan van eẏne(n) rechtverdighe(n) bedder=/uen knechte . Sẏmon na der tijt ẏeghendet sik also . Dat jk to Darpte eẏnes / morghens vro to di qua(m) vor dijn bedde vn(de) sprak di to op leue in rechter vru(n)t=/schop van des wikkers weghene . heuestu dat to vnwillen ghenome(n) . so bidde jk / di hir nv mit mine(n) vru(n)den vnde mit dessen bedderue(n) luden de hir staet Dat / du mi dat vergheues . vnde segge di dat . Heddestu mi dat ghedan Dat jk di / ghedan hebbe . jk wolde de suluen sone van di nemen . De jk de hir ghedan hebbe / Datu(m) anno d(o)m(ini) . m . CCC . lxxxseptimo ip(s)o die Decollac(i)onis b(ea)ti joh(ann)is baptiste