Alle den ghenen den desse yeghenwardig(e) scrift tu kumpt wy volrad vnde detlef lutzowen bruͤdere volrad lutzowen sones floreke stuke ghert tzulowe hinrik Barnam / hinrik prestentẏn quant vnde hinrik schutte begheren witlik tu wesene vnde bethughen openbare dat wy den erbaren ma(n)nen heren ratma(n)nen der Stad tu / lubeke eren borgheren deneren vnde den eren louet hebben vnde sworen vnde in dessen yeghenwardig(en) breuen louen vnde sweren ene ware orveẏde vor vns / vnde vnse mach vnde vrent boren vnde vngheboren vnde vor alle de ghene de dorch vnsen willen dun vnde laten willen sunder yenigherleye arghelist tu / ewighen tẏden tu holdene , dar vore dat wy ouer ere lantwere breken but vnde tu huͮus vnde in der suluen reyse se vnde andere koplude beschedighet hebben / vppe der straten dar wy ouer ghe vanghen vnde ghe wundet sint vnde vnse haue vorloren hebben vnde dar v(m)me in eren thornen vnde sloten ghe vanghen / seten Also dat wy vorlaten vormyddelst vnsen eeden vor vns vnde alle de vnse vorscr(euen) aller mani(n)ghe vnde wrake vnde louen in ghuden truwen vnde / sweren sunder arghelist dat wy der suluen heren erer borghere denere vnde der erer vyende nu(m)mer mer werden willen vnde se ere ghut vnde ere stad tu / lubeke nu(m)mermer beschedighen willen hemelke edder openbare noch in rade edder in dade willen wesen dat se beschedighet werden vtghenome(n) allene wes wẏ / in openbaren orleghe vnses rechten bornen heren mit like vnde mit eren duͮn moghen . Ok loue wy mit ghuden truwen dat wy de straten vnde de zee nu(m)mer/mer berouen willen noch in rade edder in dade wesen willen dat se gherouet werde Vnde wy volrad lutzowe van zwerchowe Reymer haghenowe Luder / lutzowe hans lutzowe vnde hinrik prestentẏn beke(n)nen vnde bethughen dat volrad vnde detlef lutzowen bruͤdere volrad lutzowen sones floreke stuke ghert / tzulowe Hinrik Barnam hinrik prestentyn quant vnde hinrik schutte alle desse vorscr(euen) artikele ghe louet vnde mit vpgherichteden vingheren ghe sworen hebbe(n) / Hir enbouen loue wy ok mit ghuden truwen vnde mit samederhant dat se alle desse vorscr(euen) stucke scholen holden vnghebroken Vnde weret dat ghot afkere / dat se desse vorscr(euen) stucke nicht enhelden also dat dar yenich ghe breͤk ane schude vnde de heren ratma(n)ne ere borghere denere edder de eere van een edder / den eeren beschedighet werden so wille wy borghen edder wilker van vns van den heren ratma(n)nen vorscr(euen) dar tu eschet wert by(n)nen verteyndaghen / neghest volghende by truwen vnde by eren komen in de stad tu lubeke vnde dar en Jnleggher holden vnde dar nicht vtscheden de schade sy gantzleke(n) / wedderlecht vnde sy mit der sulue(n) heren wille vruntscop vnde guͮnste Vnde des tu thughe so sint vnser vorbenomeden borghen Jnghes(egel) mit der andere(n) / vnser houetlude vorbenomet Jngheseg(el) mit vnser rechten witscop vor dessen bref ghe hanghen De gheuen is tu lubeke an deme Jare ghodes dusent / drehundert Jn deme lxxxix Jare vppe de vorhochtid Sunte petri ad vincula