Witlik si al den ghennen de dessen bref seen edder horen lesen . . Dat wi bertold vnde herman vedderen vnde knapen ghehete(n) / van daldorpe , bekennet vnde betuͦghet openbare . dat wi mẏt vullenkomene(m) beradeneme muͦde vnde mẏt vulbord al / vnser neghesten eruen hebben vorkoft Rechtliken vnde Redeliken den erliken mannen frederike wantzeberghe der he=/ren schencken van luͦbeke vnde otten wackerbarde voghede to molne . to truwer hand der vorb(e)n(anten) heren van lubeke al / dat holt dat dar is stande edder ligghende vppe deme velde to daldorpe . binnen der schede de desse borb(e)n(anten) frederik vnde / otte mẏt vns vnde mẏt vnsen medelouere(n) naghescreuen witliken ghereden hebben . de zuͦlue vorb(e)n(anten) schede beghinnet sik / vte deme voerde to daldorpe an . den Rechten wech vt , de dar gheit to wøtzetze to der luchterenhand vnde endet zik / vppe deme grauen de dar beleghen is ouer deme weghe bilanghes de dar gheit van lutow wente in den suluen voͤrt / to daldorpe allent wat de wint weẏgen edder Roͤren mach . vor achte(n)tich m(a)rk lubescher pe(n)nyng(he) de vns wol to ener / noghe alrede betalet zint vnde de wi in vnse mit ghekeret hebbe(n) . Al desses vorb(e)n(antes) holtes scholet se bruklike(n) bruke(n) / to houwende vnde enwech to bringhende woͤr se willet vnde wan dat en euene komen mach . de wile dat id dar is vnde / wanne dat af ghehouwe(n) is altomale vnde enwech ghebracht is zo hored vns de grunde eghen to na alse se vore dede(n) / Ok so schole wi vnde willet en desses vorb(e)n(antes) holtes waren vor allen de vor recht komen willen . . dit loue wi bertold / vnde herman veddere(n) gheheten van daldorpe vorb(e)n(ant) mẏt vnsen Rechte(n) eruen vnde mid vnsen medelouere(n) hir na=/gheschreuen mid ener zamenden hand . . vnde wi otte vnde ludeke vedderen vnde knapen gheheten schacken beke(n)=/net vnde betuͦghet openbare dat wi mid ghudeme willen loued Rechtlike(n) vnde redelike(n) mẏt bertolde vnde herma(n)ne / vorb(e)n(ant) vnde mẏt eren Rechte(n) Eruen in ghuden truwe(n) vnde mẏt ener zamenden hand den wisen Erbare(n) here(n) den bor=/ghermesteren vnde deme ghantzen raͤde der stad to luͦbeke vnde frederike vnde otten eren ambachtluͦden vorb(e)n(ant) to / erer truwen hand stede vnde vast toholdende sunder ienigherhande hinder hulperede edder arghelist . vnde to ener / grotere(n) bewaringhe vnde betuchnisse alle desser vorscr(euenen) dinghe vnde stuͦcke so hebbe wi vnse Jngheseghele witliken / vor dessen bref ghehenghet laten . . de ghegheuen is na den Jaren godes dusend drehundert in deme een vnde Ne=/ghentighesten iare vp sunte Jacobes dach des hilghen apostoles . /