JN godes namen amen . Jk Johannes Westhoff Mechtich mines liues miner synne vn(de) / miner redelicheit . Weret dat ik verwu(n)nen woͤrde va(m)me dode dat ik stoͤrue . so sette / ik aldus mijn testament alse hir nascreue(n) is To deme ersten gheue ik . iiij . sol(idus) to / beteren weghe vnde steghe . jtem si witlik ofte mijn wijf eyne bord leuendich telet / to der werlde van miner weghene so gheue ik er tovoren ere kledere to ereme / liue ghesneden mit alleme kleynode . dat dar tohoͤret . so ik er ghetuͦghet hebbe / vnde dar to . C . m(a)r(k) lub(esch) vnde alle mijn ander ghuͦt beweghelik vnde vmbeweghe=/lik gheue ik dan mineme vors(creuen) wiue vnde der bord tosame(n) lijk vnder sik to deylende / to brukene vnde to hebbene . Were ok dat se neyne bord leuendich ter werlde entele=/de van miner weghene , So gheue ik er ere kledere mit deme kleynoͤde alse vors(creuen) / is vnde dar to . ij C ¹ . m(a)r(k) lub(esch) . vnde dan alle mijn ander ghuͦt beweghelik vnde vmbe=/weghelik gheue ik mine(m) vader vnde miner moͮder . Dat se miner sele dar van don / alse ik en to truwe . Mine vormu(n)dere kese ik Hern Hinrik westhoff mine(n) vader / Hern Herman yborch vnde Johanne va(m)me sode . alle vorscreuene stuͦcke wil ik stede / vnde vast holden bet ik se witliken wederspreke . Ghegheue(n) jn deme jare vnses / heren veerteẏnhuͦndert des Donredaghes vor suͦnte Peters daghe ad cathedra(m) . / Tughe sijn Her Herman voͤrste vnde Her arnd sparenberch Radma(n)ne to lubeke