Anno (et cetera) . mº . cccc xlvº . Scholastice v(ir)ginis / De Ersame her Johan Luneborch Ratman des Rades der stad Lubeke / vor deme boke heft bekant , dat he vnde sine eruen , to truwer hant des / Ersame(n) her Johan gerwers , ok Ratman(n)e des erben(omeden) Rades der Stad lubeke / hebbe(n) in guder vorwaringe , enen opene(n) besegelden breff van den hoch/ geborn(en) furste(n) vnde heren , hern Magnus Bisscoppes to Hildensem vnde / hern Bernde hertogen to Sassen , Engeren vnde Westualen broderen mit / eren vnde erer , manne(n) anhangenden Ingesegelen na lude vnde Inne/ holde des suluen breues besegelt , sprekende vppe tweyhundert mark / vnde vertich mark Lubesch jarliker , ewiger Renthe , alse binnen Lubeke genge / vnde geue sin , vor verdusent mark lubesch vte Soͤs dorpen vnde gudere(n) / alse Lutauwe , Witzetze , groten Sarauwe , Bru(m)messe , Nẏenmarcke vnde / Parkentin , In eren landen , to Sassen im Stichte to Rasseborch belegen / mit allen eren tobehoringen (etc) An welkem houetsu(m)men hern Johanne / Gerwere dusent , mark , vnde her Johan(ne) Luneborge , dre dusent mark / mit so vele Renthe(n) alse islikem vor Sine Su(m)men anroret to behore(n) / Vnde den vorscr(euen) besegelden houet bref , loue ik her Johan Luneborch / mit mẏnen eruen by vns an guder vorwaringe to beholdende vnde / den houetbreff van vns nicht to donde , id en Beschee vnd sy , mit vulbord(e) / vnde gudem willen her Johan gerwers vnde siner erben(omeden) eruen Sunder / argelist /