Wy brodere hinric(us) p(ri)or marq(ua)rdus wyse Joh(ann)es barensteker hoger(us) oldenborch h(er)ma(n)n(us) / osenbrugge Joh(ann)es nyenkerke Joh(ann)es dyssen lesemester Joh(ann)es banquast vnd(er)prior Joh(ann)es vos / de oldesten vnd vortmer alle wy ande(re)n brodere des closters tor borch by(n)nen lub(eke) prediker orde(n) / beke(n)nen openbare in dessem breue dat wy v(m)me y(n)neger bede vnd(e) begerynge willen des ersa/men mansz diderik wedegen vnsz vn(de) vnse nakomelynge to ewigen tyden dar to hebben / vorbunden vn(de) vorbynden mit kraft desses breues dat wy in der nyen cappellen de dar ghe/buwet heft broder Joh(ann)es barensteker in der nordern syden vnses nyen chores scholen vnd(e) / wyllen lesen laten alle weken dre missen gode to laue vnd(e) to ere(n) To troste vnd(e) salicheyt / dyderik wedeghen zele ergheno(mede)n vnd syner olde(re)n vnd(e) aller dar he des vorbegheret Alse / des sondaghes des mitwenkensz vnd(e) des vrigdaghes vnvorsumet ewichliken vnd(e) de misse(n) / schalme holden tho achten an der clokken vnd(e) wy scholen em dar ene(n) prester to setten van / vnsen broderen na synen wyllen ok schole wy de lichte to der cappellen besorghen des ghelikes / to ewighen tyden , Vortmer hebbe wy em in der sulue(n) cappellen ghe gheuen vrẏe graft na / synen dode vor syne personen weret ok dat he yeme(n)de der graft dar y(n)ne gu(n)ne(n) wolde in syne(n) / leuende edder na syne(m) dode de scholde don vor de graft kerkrecht alse vontlik is Vp dat nu / diderik ergeno(mede)n nicht vndanknamich en were sodaner vorbyndynge so heft he vnseme / clostere ghe gheuen to ener mylden almissen druddehalf hu(n)dert lub(esche) m(a)rk dar wy rente / mede kopen scholen der wẏ alrede anderhalfhu(n)dert vpgheboret hebben vnd(e) de anderen / nastendegen hundert scholen vns gheue(n) de vormu(n)der synes testamentes na synem dode / Ok wil he to der suluen cappellen tugen vnd(e) gheue(n) ene(n) vorguldeden kelk vnd(e) een orna/ment dar men ynne holde missen vnd(e) wil he dar baue(n) wat tughen inde cappellen dat / schal stan an synen vrien wyllen Hir sint an vnd(e) auer wesen hildebrant swengel vn(de) / gerd poppe borghers to lub(eke) Vnd(e) wy vorbeno(mede)n veder vnd(e) brodere scholen vnd(e) villen alle / vorscreuen stucke desses breues stede vnd(e) vast holden in guden truwen To tuchnisse vnde / merer bewarynge desses breues so hebbe wy vnses closters yngeseghel witliken ghehenget / vor dessen breff Ghe gheuen na godes bord verteynhundert iar vnd dar na indem sosvnd(e) / vertigesten iare in sunte martens auende