Mynen othmodighen wyllighen vnvordratenen denst myd begeringe / alles guden Erbaren vorsichtighen heren vnde gebedegere jw geloue to / weten dat yk myd wolmacht myner denere vnde haue vngelettet to / nure(n)berg byn gekamen jodoch myd groter besorchlicheyd vnde vorspildi(n)ge / leyde geldes we(n)te de lande dar ik dorch gereden hebbe vnde noch vorbat / ridende werde deger besorchliken stan vnde yk hebbe nv twe daghe gelegen / bynnen nure(n)berghe dat yk my sunder selschupp vnde geleyde nicht / dorste geuen na reghensborg we(n)te dagelinges de wanderende man in / koni(n)g Cristoffers lande twsschen nure(n)berghe vnde reghensborg(e) an / geuerdiget vnde berouet wert v(m)me dat dat land su(n)der heren vnde / regeme(n)te steyt des de Erba(r)en de rat to nure(n)berghe so my itlike des / suluen rades berichtet hebben nicht keren kan v(m)me ma(n)nich foldicheyt / der heren v(m)me zee beleghen de zee v(m)me eres gudes wyllen in vngu(n)st / holden gelik gy van ichteswelken heren by jw beleghen lichte geholden / werden Jodoch hebbe ik nv selschupp gekreghen de myd my trekken / wyl bette to wene i(n) osterich dor ik van stunt denke mede to ride(n)de / got de here zy vnse leydesman de Erba(r)en de rat to nure(n)berghe hadde / my gherne gelenet enen erer denere auer zee seden sulken ere dener / were so vnvelich in des erscr(euen) heren koni(n)ge Cristoffers landen alse yk hir=/v(m)me sluch ik sulkent van der hant de rat to nure(n)berghe vnde geme(n)liken / alle de lant dar yk dorch gereden byn besorghen sik zere vor den dra/uanten?? vnde ward(et) erer alle daghe to kame(n)de yk hebbe hir geurechet / dat de romessche koni(n)g tor Nuwe(n)stat i(n) osterik wesen schole yk denke / my em na myner mogelicheyt to beualende jwe werue my beualen vort / to settende so yk na plichtighem denste schuldich byn soda(n)ne gelt alse / de Ersamen jwe kemerer hebben by otten meygere auer gekofft hebbe / yk hir tor nughe entfangen van enen borghere geheten Euerhart / Schoͤne vnde ysset sake dat gy my wes na scr(euen) wyllen dat moghe gy / zenden an den sulfften Euerharde [w]or ¹ ane gy wol vorwaret zin edder / an Joste Caffor Jodoch sette yk groteren gelouen an den vorscr(euen) Euerharde / schoͤnen we(n)te he en Erbar borgher hir to nure(n)bergh ys??² nicht sakende / zin p(ro)fit men allenejwe Ere vnde vordernisse zyd ghade beualen / gescr(euen) myd der hast to nure(n)berg am hilgen aue(n)de ma(r)ie magdalene / a(n)no (et cetera) xlvij vnder myne(n) Jnghesegele yk wyl ³ ysset dat gy wes my / nascr(euen) wyllen dat zendet an den vorscr(euen) Euerharde schone we(n)te yk sulke(n)t / myd em auerspraken hebbe vnde byn des myd em enes vnde nicht an / Joste Caffer / Doctor arnoldus van bremen / Jwe othmodighe dener