JN godes Namen Amen Witlijk sy Dat Jn den Jaren vnses Her(re)n Nach syner gebord Dusentveerhundert / Achtevndeveertich Der elfften Judictien Pawes domes des Alderhilgesten vaders vnd(e) Here(n) Here(n) Ni/colai va(n) gotliker vorsichticheyt des vefften Jn dem Andere(n) Jare Des Sonnaue(n)des Na Paschen dede / was de Drottigeste dach des manen marcij Jn Jege(n)wardicheyt mynes Opembare(n) Notarien vnd(e) / Schriuers vnd(e) desser nagescre(ue)n tuge(n) Jn vnser leuen vrouwe(n) kerken bynne(n) lubeke synt gewesen De / Ersame(n) vnd(e) vorsichtige(n) Manne Here(n) Johan Colma(n) Borgermeistere der Stad lubeke / Hinrik vru(n)t vnd(e) Johan va(n) Stade Borgere alse rechte vnd(e) vulkamene testame(n)tarij selige(r) here(n) Hinrik / Rapelsuluers ok Borgermeisters der Stad lubeke vnd(e) mich to donde Dem lesten willen des vorscr(eu)en here(n) Hin=/rikes So hebbe(n) se dar suluest vor syk gehad de beschedene Manne vnd(e) Scholere by Name(n) Her Joha(n) / grouehage(n) prester Johan(n) mo(n)nick cleric(us) des stichtes Monster Petru(s) Mendelborne vnd(e) He(n)ningu(s) voget / dar Jegenwardich vnd(e) Georgiu(s) Rosenberg begheue(n) tor Borch vnd(e) Gotscalcu(s) kulen affwesende Den se / same(n)tliken vnd(e) enem Jsliken hebbe(n) vorlenet vnd(e) vorlene(n) Jn krafft desses Jnstrume(n)tes So dat en / Jslyk van den nalatenen gudere(n) des vorscreue(n) here(n) Hinrikes scal hebben Jarlikes vefftich mark lubes(ch) / geldes Dar mede se scholen Studiren Jn dem Werlikem edder gheistlikem rechte edder anders alse / dar tho denen scal vnd(e) mogen stan to Erforde to liptzijke To Collen , edder to Rostock De / vorscreue(n) Her Johan(n) Joha(n)nes Petrus vnd(e) He(n)ni(n)gus vnd(e) de anderen vorscreue(n) hebbe(n) ok dar sul/uest bekannt dat se desse vorscreuen vefftich mark Men to enem Jare scholen bruken vnd(e) hebben / Also weret dat na vorlope des erbenomede(n) Jares , den erben(omeden) Here(n) vormu(n)dere(n) vnd(e) erennakomelin/gen duchte dat se en allen edder enem besunder(e)n sodanne vefftich mark to lengere(n) Jaren wolden / gu(n)nen vnd(e) volgen laten edder nicht Wente se lichte nicht en don edder Studiren so se va(n) rechte / scholen Dat scal stan to erem gantze(n) vulkame(n) willen vnd(e) nicht to den Studenten Jn tugenisse / der warheyt So hebbe ik Johannes hertze Notarius hir to van den vorscreue(n) vormu(n)deren vnd(e) den Scholeren geesschet vnd(e) gebeden dyt Jnstrument Mit mẏner eghene(n) Hand vnder screue(n) vnd(e) / vormiddelst myme plegeliken teken getekent , Dar an vnd(e) ouer synt gewesen De Ersamen Ma(n)ne / Her Hartwich de Eken ? vicarius Jn vnser leuen vrouwen kerken bynne(n) lubeke vnd(e) Hinrik heẏ/dorne Borger to lubeke tuge dar tho geesschet vnd(e) gebeden /