Oberes Exemplar

Jn godes namen Amen Jk titke kryuitze borger vnde gastmester in deme lutteken hilgengeyste to lubeke krank van Lyue / doch gode to loue wolmechtich vnde gesund myner synne vnde reddelicheyt wert got my in desser krankheyt van desser / werlt na naturlikem vorlope de schult des vlesches to betalende esschende So ordenere ik vnde make mynen lesten / willen vnde testament van mynen wolwu(n)nen guderen aldus Jnt erste geue ik wege vnde stege to betterende / viij s(chilling) lub(esch) Jtem yewelkem krancken tom hilgengeyste op den bedden liggende enen s(chilling) in de hand to donde Vnde / yewelkem zeken to Sunte Juryen vor lubeke ok enen s(chilling) in de hand Jtem geue ik dar sulues ok to sunte Jurien den houet=/luden Sunte Jostes bruderschup v mark to hulpe sulker vilien de se dar menen to makende alle sondage tho syngende vnde / wil dat se my dar vor in ere broderschup entfangen Jtem dem kalande tom hilgen geyste dar ik broder ynne bin geue / ik ok v mark lub(esch) Jtem myner modderen taleken Calues Jn Sunte Joha(n)nes kouente geue ik v mark lubesch Jt(em) geue / ik mynem brodere her gregoriese mynen brunen Roeck myt deme vodere vnde en suluerne schalen vnde mynem broder / hanse mynen swarten vnde gronen Rock myt deme vodere vnde ene suluerne schalen vnde wil dat se vnde alle myne / eruen dar mede van mynen nalatenen guderen scholen wesen gescheyden Jtem mynem vedderen didericus geue ik / enen suluerne becker vnde dar to qwit xx mark lub(esch) myn iiij s(chilling) de he my is schuldich Jtem katrinen myner maget / geue ik iij mark lub(esch) vnde dar to qwit iiij mark de se my is schuldich van eren blauwen rocke Jtem so geue ik geseken / myner Dernen v mark wannen ze to den eren beradet Corde myne(m) knechte in der klus geue ik mynen grawen / rock vnde hanse mynem knechte geue ik ij mark hanseken deme Jungen ij mark Jtem negels mynem iu(n)ghen ijm(a)rk / Jt(em) so hebbe ik op meyster hermans vam hagen schriuers der here(n) des Rades to lub(eke) bone / en kuntor vnde ene schepkysten / Dat kuntor geue ik her herma(n) willerdes vnde de kisten pauwel spane Dar tho geue ik deme suluen pauwele myn mest / myt suluer beslagen vnde myn beste suluerne gordel Jtem her herma(n) vam hagen geue ik enen suluerne becker Jt(em) / hans Ribbenissen husvrouwen geue ik ene grone broden mit suluer beslagen vorgult Jtem alle myne anderen ghu=/dere de bouen desse vorschreuen giffte vnde gaue ouer blyuen wil ik dat myne testamentarij de keren vn(de) geuen / war ene duncket dat de alder nuttest to myner sele salicheyt mogen komen Mine testame(n)tarij kese ik hanse Ribbe=/nissen vnde pauwel spane vorbeno(me)n vnde wil dat se dit myn testame(n)t yo er de leuer vthrichten na mynem dode / Dat ik stede vnde vast vnuorbrocken wil holden Rope ik dat in wetenheyt vnde liffliker stempme nicht wedder Dat ghe=/gheuen vnde geschreuen is na den yaren vnses heren dusend veerhundert in deme Negenvndevertigesten yare des don=/redages vor laurencij Tuge synt her Johan Syna vnde her hinrik van Styten Radman(ne) to lubeke

Unteres Exemplar

In godes namen Amen Ik titke kryuitze borger vnde gastmeyster in deme lutken hilgengeyste to lubeke krank van liue / doch gode to loue wolmechtich vnde gesund myner synne vnde reddelicheẏt wert got my in desser krankheyt van des/ser werlt na naturlikem vorlope de schult des vlesches to betalende esschende So ordenere ik vnde make mynen leste(n) / willen vnde testament van mynen walwun(n)en guderen aldus Jnt erste geue ik wege vnde stege to betterende / viij s(chillinghe) lub(esch) Jtem yewelkem krancken to(m) hilgengeyste op den bedden liggende enen s(chillingh) in de hant to donde vnde ye/welkem zeken to Sunte Jurien vor lubeke ok enen s(chillingh) in de hant Jtem geue ik dar sulues ok to sunte Jurien den / houetluden Sunte Jostes bruderschup v mark to hulpe sulker vilien de se menen dar to makende alle sondage tho / syngende ¹ vnde wil dat se my vor in de broderschop entfangen Jtem dem kalande tom hilgen geyste dar ik broder ynne bin / geue ik ok v mark lub(esch) Jtem myner modderen taleken Calues Jn Sunte Johan(n)es kauente geue ik v mark lubesch / It(em) geue ik mynem brodere her gregoriese mynen brunen Rock myt deme vodere vnde ene suluerne schalen vnde / mynem broder hanse mynen swarten vnde gronen Rock myt deme vodere vnde ene suluerne schalen vnde / wil dat se vnde al myne eruen dar mede van mynen nalatene(n) guderen scholen wesen gescheyden Item mynem / vedderen diderice(n) geue ik ene(n) suluerne becker vnde dar to qwit xx mark lub(esch) myn iiij s(chilling) de he my is schuldich Jtem / katrinen myner maget geue ik iij mark lub(esch) vnde dar to qwit iiij mark de se my is schuldich van eren blauwe(n) rocke / Jtem so geue ik geseken myner dernen v mark wan men se to den eren beradet Corde myne(m) knechte in der clus geue / ik mynen grawen rock vnde hanse mynem knechte geue ik ij mark hanseke deme Jungen ij mark Jtem negels / mynem iu(n)ghen ij mark Jtem so hebbe ik op meyster hermans vam hagen schriuers der here(n) des Rades to lub(eke) boue / en kuntor vnde ene schipkisten dat kuntor geue ik her herman willendes vnde de kisten pauwel spane dar tho / geue ik deme suluen pauwele myn mest myt suluen beslagen vnde myn beste suluerne gordel Jtem her herman / vam hagen geue ik enen suluerne becker Jtem hans Ribbenissen husvrouwen geue ik ene grone broden mit suluer / beslagen vorgult Jtem alle myne anderen gudere de bouen desse vorschreuen giffte vnde gaue ouerblyuen wil ik / dat myne testamentarij keren vnde geuen war ene duncket dat de alder nuttest to myner salicheyt moge(n) komen / Myne testamentarij kese ik hanse Rybbenissen vnde pauwel spane vorbenom(ed) vnde wil dat se dit myn testament / yo er de leuer vthrichten na mynem dode dat ik stede vnde vast vnuorbroken wil holden Rope ik dat in weten/heyt vnde liffliker stempine nicht wedder Dat gegheuen vnde geschreuen is Na den yaren vnses heren Dusend / veerhundert in deme Negenvndeveertigesten yaredes donradages vor laurencij Tuge synt her johan Syna / vnde her hinrik van Styten Radman(ne) to Lubeke