JN Godes namen Amen Jk Brun warendorp wolmechtich mynes liues myner sinne vnde redelicheyt sette vnde / make myn testamente van mynen guderen na mynem dode to entrichtende aldus Jnterste wege vnde stege / to beterende geue ik j m(a)r(k) lub(esch) Jtem sunte Gregorius broderscop to sunte Jacobe geue ik v m(a)r(k) vor myne dechtnisse / Jtem int closter sunte Marien Magdalenen to hildensem dar myne dochtere begeuen sint geue ik C m(a)r(k) lub(esch) / den Juncvruwen gemenliken to erer koste behof dat ze vnsen heren god vor my bidden Jtem int closter to Ruͦne / geue ik xl m(a)r(k) den juncvruwen kolen dar van to besorgende vnde wes ze behof hebben to erer vuringe dat / ze god vor my bidden Jtem geue ik in godes ere lx m(a)r(k) lub(esch) den nottroftigen armen gemenliken in ere han/de to delende Jtem den armen kranken to dem hilgen geeste vp den bedden liggende Vnde den elenden zeken / sunte Jurgen vor lub(eke) vnde den anderen elenden zeken vmmelangh desse Stad buten wonende geue ik same(n)t/liken C m(a)r(k) lub(esch) en like in ere hande to delende alze dat mynen vormunderen nutte dunket Jtem hern Hen/nynge myneme zone geue ik xv m(a)r(k) lub(esch) Jtem willeme . Hanse . Hinrike . Jurgen . Godschalke vnde Vol/mare mynen zones geue ik al sodane gudere alse my van myner moder na erem dode touallen mogen dat / ze de vnder en like delen Jtem Volmar mynem zone geue ik sunderges C m(a)r(k) lub(esch) . vnde wil dat desuluen / myne zones alle myt dessen gauen scholen gheschichtet vnde scheden wesen van alle mynem anderen gude / wente ik en erfschichtinge gedan hebbe alze der Stad bok wol vthwiset Jtem katherinen myner leuen hus/vruwen geue ik alle vruwelike cledere smyde vnde clenode de ze to erem liue plecht to dregende vnde dar / to de helfte mynes huses dar ik inne wone myt allem Jngedome vnde tafelsmide dat my dar ane tobehoret / er varende to hebbende vnde to brukende vnbeworen Jk geue er ok vnde mynen kinderen de ik van er ghe/teld hebbe vnde vordan van er telende werde samentliken alle myne anderen gudere bewegelik vnde vnbe/wegelik de na entrichtinge mynes testamentes ouerbliuen ze sin welkerleye ze sin vnder en na personen / tale like to delende . Myne vormundere kese ik her Godeke plescowen . Hanse van wickeden . Godeken kerk/ringe vnde hanse ilhorn den Jungeren . vnde wil dat her Johan bunstorp vicarius to sunte Jacobe myt my/nen vormunderen bi mynem testamente raden don vnde laten schole in allen dingen sunder bewernisse enes / iewelken Ok wil ik wan welk myner vormundere steruet dat denne de anderen leuendigen enen bedderuen / man in des doden stede wedderkesen so vakene alse des behof wert Alle desse vorscreuenen stucke wil ik stede / vnde vast holden went ik ze witliken wedderrope Gheuen na godesbord verteynhundert Jar vnde dar na Jn / deme viftigesten Jare vppe den dagh Panthaleonis des hilgen mertelers . Tuge sint her Gherd van myn/den vnde her Jacob bramstede Radmanne tho lubike /