JN godes namen Amen Jk he(n)nẏngh koldeveld wolmechtich mynes lyues myner synne danken vn(de) redelicheẏt Jfft ik va(m)me dode / vorekomen werde , So sette ik to der ere godes mẏn Testamente vnde lesten willen van mẏnem wolwunnenen gude na mẏne(m) / dode to entrichtende aldus . To dem eersten geue jk j mark to beterende weghe vn(de) steghe . Jtem den preesteren in der Doͤm=/kerken . Jn suͦnte ẏlligen kerken , to Sunte Jurgen vor desser Stad , vnde to suͦnte Johanse vpme zande , geue ẏk ẏslikem ene(n) s(chillingh) / jn sẏne hand , vn(de) beghere dat een ẏslik lese ene vigilie vn(de) des morghens ene mẏssen van der hilgen Drevaldicheẏt mẏt / ener Collecten vor alle Cristene zele tobeslütende . Jte(m) den preesteren to vnser leuen vrouwen . to suͦnte Petere . vnde to su(n)te / johanse dem vrowen Clostere , geue ik ok ẏslikem enen s(chillingh) , vn(de) beghere dat ze ok also holden Jslik ene vigilie , vn(de) des morghens / ene mẏssen van vnser leüen vrouwen , mẏt der vorscre(ue)n Collecten . Jte(m) geue ik vort den preesteren to sunte Jacobe to deme / hilgengheeste , to sunte Cleme(n)te , vn(de) to sunte Ghertrude , Desgheliken Jlkem enen s(chillingh) . vp dat se ẏo de vigilien lesen , vn(de) des / morgens ene mẏssen van dem hilghen gheeste mẏt der vorghenom(eden) Collecten . vnde dat myne vormu(n)dere dat also vordere(n) / vnde bestellen dat de benomeden preestere jo dessulue(n) daghes alse ik vorscheden bẏn , sunder vorsuͦmenisse ¹ de vigilien vnde / des morghens de mẏssen geholden werden mẏt der Collecten vorgheroret ane beneme ẏd noetsake , dat yd denne ẏo sche des / neghesten daghes , vnde de preestere mẏ alle in ere ẏnnighen dechtnisse nemen , vp dat sik god oüer mẏne zele vorbarme . / Jtem den armen zeken to sunte Juͦrgen vnde vort in den anderen neghen zekenhusen neghest v(m)melank desse Stad geue ẏk / ẏewelkem twe s(chillinghe) in ere hande torokende ² , dat se truwelken vor my bidden , Jtem den broderen to der borgh geue yk x . m(a)rk / lub(esch) . to dem buwe , vp dat ze mẏ in ere dechtnisse nemen vnde vlytighen vor mẏ bidden . Jte(m) geue ẏk in godes ere vefftich m(a)rk / lub(esch) , De scholen mẏne vormu(n)dere tokeren vn(de) handreken armen notrofftigen mẏnschen , vnde den huͦsarmen vnde wor ẏd en / dunket bestedet wesen by twen schillingen vnde nicht hogher Vp dat de armen alle den leuen god vor mẏ bidden . Jt(em) geue yk / v(m)me godes willen noch xxv . mark lub(esch) . den armen bedeleren Jntghemene bẏ pe(n)nẏnghen vnde scheruen . Jn den mẏnen / vormünderen ẏd best dunket bestedet wesen v(m)me salicheẏt myner zelen . Jtem ẏsliker begheuenen ju(n)cvrowen jn des hilge(n) / gheestes huse geue ik ene halue mark lub(esch) . rede in ere hande dat se mẏ by gode gnade vorweruen . Jt(em) in den vijf Oldesten / Elenden huse bÿnne(n) lubek geue ik xxv . mark lub(esch) . yewelkem p(er)sonen de dar herberghe ane hefft sẏn part in de hande / to donde vp dat se vlẏtigen vnsen heren god vor mẏ bidden Jtem sunte Birgitten Clostere by Molne geue ẏk xxx . / mark lub(esch) to erem buwe , dat se my in eren guden werken in ere dechtnẏsse nemen vn(de) god vor mẏ bidden . Jte(m) Sunte Bir=/gitten Clostere vor dem Sünde , Den reghelbroderen to Zegeberghe Dem Clostere to der he(m)melporten vn(de) den karthu=/seren to Vrankenvorde , geue jk in ẏslike stede teẏn mark lub(esch) . ere buwete mede to beterende , dat se alle vor mẏne zele / jnnichliken bidden . Jtem den Grawen mo(n)niken to Swerijn den broderen to Selle den armen broderen to Hildensem / in dem brüle ÿeghen den pewelers oüer . vnde dem Clostere dat Johan büxstehude buwet hefft geue jk in yslike stede / teẏn mark lub(esch) . dat se vnsen here(n) god vnde de moder der barmherticheẏt mẏt vlẏte vor my bidden . Jtem myner sust(er) / dochter Jutteken Pawel lobeken husvrouwen de myn negheste erue ẏs , geue jk veftich mark lijfrente , de tijde eres / leuendes suluen to godes loue to brukende , De jk rede hebbe gekofft alse de besegelden breue vtwyset ³ gegheuen vn(de) ma=/ket synt . Hijr to geue ik eͤr l . mark lub(esch) . de mẏ ere man Pawel vorscre(ue)n schuldich ys vn(de) ik em rede gelenet hebbe . / Jtem dersuluen mẏner suster dochter dren dochteren , leuet se mẏnen doet , so totekene jk en vn(de) beschede ẏsliker C . m(a)rk / lub(esch) . Scheghet ok dat ze meer dochtere kreghe , De scholen ok lijk deel mẏt den anderen jn den dren hundert marken / hebben , Men ik wil jfft der dochte(re) welk steruet vmberaden , So schal de helffte des vorstoruenen kyndes andeel to val/len erflik vp de anderen dochtere . vn(de) de anderen helfte schal denne hebben dat Closter to sunte Birgitten bẏ Molne / to erem buwe v(m)me mẏner zele willen , Men steruen de meghedeken alle vmberaden , So schal de moder Jutteke mẏner / Suster dochter de helfte van den latesten hundert marken erue(n) vnde beholden Vnde de anderen helffte to dem buwe / to sunte Birgitten Clostere vorscre(ue)n . Jtem weret ok dat desulue mẏner suster dochter nene dre dochtere leüendich / hadde na mẏnem dode Allẏkewol schal denne jslik nicht meer wan hundert mark hebben jn der vorghenomeden / wẏse , veftich mark schal to Sunte Birgitten Closte(re) to dem buwe bẏ Molne , de anderen vefftich mark dar schal / men arme ju(n)cvrouwen mede beraden . Vnde hadde denne Hans van Münster de Schomaker in der vleschhouwerstra=/ten dochtere den ghünde jk des leuest ⁴ v(m)me dat mẏ de moder wes van maghesschop tobehoret Jk wil ok dat mẏne vormu(n)=/dere desse vakenomeden dre hundert mark lub(esch) . bẏ sik scholen beholden Vnde der kyndere vromen mede to donde vnde in / rechtuerdicheyt vort to kerende na erem vormoge , went datme(n) de kẏndere schole beraden . vn(de) sik also hijr ane to bewẏsende / alse jk en wol betruwe . Jtem desser mẏner Suster dochter Jutteken ghaue vn(de) erer dochtere totekenẏnghe . vn(de) ok myns / vrundes Tẏdeman lankoppes ghaue , Scholen mẏne vormu(n)dere vul vn(de) al entrichten vnvormẏnnert Soveͤrne mẏne / gudere dat afflanghen konen . Vort wil yk dat jutteke mẏner Suster dochter vn(de) ere kẏndere mẏt desser ghaue vnde / beschedinghe ghansliken scholen geschichtet vnde delet wesen van alle mẏnen anderen nalatenen guderen , Doch v(m)me / leüe willen welk eer van eren dochteren eersten beraden werd , Der gheue ik mẏn bedde mẏt dem houetpole vnde / dar to twe par lakene de sẏnt in mẏner kẏsten vp dat se gode to denste werde vn(de) myner by denke . Jtem Tydeman lan=/koppe geue jk Sostich mark lub(esch) . vnde geue em ok quijt wes he mẏ schuldich is Jtem to dem Nẏen Clostere by buxste=/hude , gheue ik to dem buwe x . mark lub(esch) . vn(de) Metteken va(m)me haghen Clostervrouwen darsulues geue jk ok x . mark / lub(esch) . rede in ere hande , dat se den leuen god vor mẏ bidde . Jte(m) her Nẏcolawese dem predeker in dem dome geue jk my=/nen grawen Rok mẏt dem wulvesvodere , vnde dar to mẏnen hoẏken van deme suluen wande vn(de) x . mark lub(esch) . So verne / alse de na entrichtinghe mẏnes Testamentes ouerlopen , vp dat he mẏ in sẏnen guden werken dechtich wese . Jtem / Peter Alüe geue jk den wuluesrok dar neghest mẏt der klenen koghelen van demsuluen wande mẏner bẏ todenkende / Jte(m) her Nicolawese klinksporen geue jk mynen blawen hoyken vnde Rok vngevodert mẏt der koghelen va(m)me sulue(n) wa(n)de / vnde dar to . x . mark pen(ninghe) . moghen ze ouerlopen wan myn testamente vteret ẏs to guder dechtnisse . Jtem hans Oden / mẏnem knechte geue jk alle mẏne wamboẏse , vnde den lutken blawen wuluesrok vmme sẏnes truwen denstes willen / Jtem den koͤken vnde megheden in mẏns werdes hüse , geue ik jlkem ene halue mark lub(esch) vnde den junghen malkem / iiij . s(chillinghe) vnsen heren god vor my to biddende . Jtem were ok ẏemande de sik my negher to magheschop meende to wesende offte / so na rekende , alse myn vorghenomede ⁵ Susterdochter vnde ere kyndere der sẏ een offte meer den gheue jk same(n)tlike(n) / x . mark lub(esch) . Vnde jk wil dat ze dar mede van alle mynen anderen guderen scholen wesen ghescheͤden vnde delet vnd(e) / nicht vurder dar vp to zakende . Vort wil ẏk jfft sẏk mẏne gudere na desser tijd vormẏnnerden dat se nicht nogafti=/ghen toreken konden , Dat god aff keren mote . So scholen myne vormu(n)dere enem yslikem na erem guddunkende aff/breken , Also dat malk wat krẏge dat he mẏner by denke , Men alle vorscre(ue)n godesghaue(n) schalme(n) vul vn(de) al entrichte(n) / Jtem jsset ok dat jk suluen bẏ mynem leüende welke van dessen vorscre(ue)n ghauen vtrichte , vnde ok myt mẏner eghenen / handscrifft in mẏnem Rekenboke vorware , Dar moghen myne vormu(n)dere dat bẏ bestan laten . Mẏne vormundere / kese jk Hern Alue greueroden . Hanse kentzeler . Hinrike blomen . vnde Hanse van der lucht . vn(de) ik gheue en samentliken / to vru(n)tliker dechtnisse alle myne lẏnene Cledere vnder sik lyke to delende vor ere arbeẏt vn(de) vnlust , vp dat ze sik bẏ / mẏnem Testamente also truwelken bewẏsen Alse jk en wol beloue vn(de) neme(n) dat loen van gode . Jk wil ok wa(n) myner / vormu(n)dere welk steruet Dat denne de anderen leuendighen enen bedderuen man , en nütte vnde beheghelik vnvorsumet / wedder kesen , Sovaken(e) alse des behuff werd , Dat ẏo mẏn leste wille ghansliken vorvullet werde Alle desse vorscre(ue)n / stucke wil jk vast vnde stede holden went jk se witliken wedderrope . Gheuen na godes bord xiiijC ẏar Dar na in / deme vẏuevndevefftighesten ẏare vp sunte Nicolawes avend des hilgen Bisschoppes . Tughe synt her werner grambeke / vnde her Alff greuerode Radmanne to lubeke Jte(m) ⁶ so begere jck vn(de) wijl wan my(n) testemente vor vullet js dat / dan my(n) vor mu(n)der alle my(n) ander na latten guder sulle(n) kere(n) in de ere gades twe allemessen in den twen / broder schappe(n) des helge(n) lijchams vn(de) sunte antonnijes neme jck leuest off jt se verne recken wijl vn(de) / vort jt ander also vorsc(re)ue(n) steijt war jt dan best bestedet duncket sin /