Wy brodere hinricus stoltenberch prior Laurencius lebrade henriccj bonhoff de oldesten / Johannes lesemester Georgius supprior vnde alle wy anderen vedere vnde brodere des closters / tor borch bynne(n) lubeke predeker ordens bekenne(n) vnde betugen in crafft desses breues dat de / Ersame Juncker herman bere vnde geske syne husfruwe seliger dechtnisse myt vns begraue(n) / vor deme hogen altare to lubeke gegeuen hefft vnseme closter vorbenomet . cc . m(a)r(c) lub(esch) dat synt / x m(a)r(c) iarliker renthe de vns vns vornoge(n) wyl de Ersamen here her Johan bere pasce . v . m(a)r(c) / vnde michahelis . v . m(a)r(c) so lange dat eme beleuet dat gelt by sick to beholdende iii effte iiij / yar lanck effte lenger vnder der tyd mach syck dat closter vorseen en andere(n) wech antholegge(n)de / myd sodamme bescede dat wy vnde vnse nakomelinge willen vnde scholen erer dencken late(n) / to ewigen tyden wen wy der andere(n) selen dencken laten dede dechnisse myd vns hebben Vorder/mer scole wy ene began wen ed syn yar tyd is des auendes myd vigilien des morge(n)s myd / selemissen vnde na der selemysse salue regina myt der collecten van vnser leue(n) vrowen dyt / scal schen den trent alle goddes hilligen Des sulue(n)gelyck scholen vnde willen began gesken / syne husfvrowen woenner dat kumpt de dach des hilgen mertelers sancti valentini en dach / iiij effte v vor effte na nach beqwemheyt der tyd Jtem des sulue(n) dages schal de prior de den ys / tor tyd geue(n) eynem ytliken brodere Junck vn(de) olt de yn deme closter ys ene(n) lub(esch) schyl(ling) yn syne / hant tho twen tyden yn den beyden begencknisse wat dar ouer blyfft de prior yn des closteres / beste mach keren To tuge allen g¹ vorgeschreue(n) stucken so hebbe wy endrachtlyken vnses closters yngesegel laten hengen vor dessen breff anno d(o)m(ini) mº cccc xcjº vp de hillige(n) dreualdich(eyt) / aue(nde) /