Wij Borgermestere vnde Radtmann der Stadt Lubeke Bekennen vnde betugen apembar(e) In vnde mit / dessem(e) breue vor alszweme de ene sehn horen edder leszenn Dat wÿ den Duchtigen Alberth van der hude vnde / Hansz Ruter Capiteynen van hundert knechten de wÿ mit densuluen knechten dre mante langh In Szolt / angenamen hadden eres truwen vnde willigen denstes fruntlich bedancken Vnde weret vns also gelegenn(e) / gewest dat wy der forder behoff gehat hedden , wolden wÿ de gerne In vnsem(e) denste beholden hebben Vnde wy / Alberth van der hude vnde Hansz Ruter erg(ena)nt(en) Bekenne(n) apembar(e) In krafft desses suluen breues vor alszwem(e) / de ene sehn edder horen leszenn Dat De Erszame Radt to lubeke vnde ere borgere vns vnde den andernn / knechten der hundert Im(me) Tale syn geweszen vnszen Szolth so se vns plichtich weren gutliken vnde fruntliken / wol to dancke vornoget vnde betalet hebben So dat wy van vnser vnde der ander(e)n knechte wegen In der erben(omeden) / van lubeke Szolth geweszenn Dem(e) suluen Rade vnde ere borger(e) guder forderinge gütlicheit vnde woldat gansz / flitigenn vnde hochliken bedancken Derhalue(n) wy den erg(ena)nt(en) Radt to lubeke ere borger(e) vnde nakomelinge deger / vnde al van vnser vn(de) der andr(e)n boue(n)schreue(nen) knechte wegen In ere(m) Szolte gewesen vorlaten vn(de) qwitert hebben / qwiter(e)n vnde vorlaten Se Iegenwordich In krafft desses breues sunder behelp vnde argelist Vnde weret ene beqwe=/me geweszenn wolde wy ene gerne forder gedenet hebben Desses to orkunde vnde witlicheit hebbe wy Borger/mester(e) vnde Radtmann(e) vorschr(euen) vnser Stadt Signet(um) Vnde Ick Albert van der hude van wegen Hansz Ruters / vnde der ander(e)n knechten alle myn Ingesegele neddenn(e) an dessen breff don hangen Geuen na (christi) geborth / vnses her(e)n Dusentveerhundertdre vnde Negentich am(me) Dage sancte Lucie virginis /